କେନ୍ଦୁଝର: ସରକାର ଦୁର୍ନୀତି ବିରୋଧରେ ଲଢେଇ କରିବାକୁ ଆହ୍ବାନ ଦେଇଛନ୍ତି । ସରକାରୀ କର୍ମଚାରୀଙ୍କୁ ନେଇ ରାଜ୍ୟର ଉନ୍ନତି କରିବାକୁ ରାଜ୍ୟ ସରକାର ବେଶ ତତ୍ପର । ହେଲେ ଏହାର ବ୍ୟତିକ୍ରମ ଦେଖିବାକୁ ମିଳିଛି ସରକାରୀ କର୍ମଚାରୀଙ୍କ କ୍ଷେତ୍ରରେ । କିଏ ସରକାରୀ କାର୍ଯ୍ୟକୁ ନେଇ ପିସି ମାଗିବାରେ ବ୍ୟସ୍ତ ତ କିଏ ଦିନ ଦ୍ବିପହରରେ ନିଶାସକ୍ତ ହୋଇ ଉତ୍ପାତ କରିବାରେ ବ୍ୟସ୍ତ । ଏହିପରି ଏକ ଦୃଶ୍ୟ ଦେଖିବାକୁ ମିଳିଛି ସୋସିଆଲ ମିଡ଼ିଆରେ । ତେଲକୋଇ ବ୍ଲକର ଦୁଇ ଜଣ ଯନ୍ତ୍ରୀଙ୍କ ଭିଡ଼ିଓ ଭାଇରାଲ ହେବାରେ ଲାଗିଛି ।
ଭାଇରାଲ ହୋଇଥିବା ଭିଡିଓରେ ଜଣେ ଯନ୍ତ୍ରୀ ନିଶାସକ୍ତ ଅବସ୍ଥାରେ ଏକ ହୋଟେଲରେ ହଙ୍ଗାମା କରୁଥିବାର ଦେଖିବାକୁ ମିଳୁଛି । ସେହିପରି ଅନ୍ୟ ଜଣେ ଯନ୍ତ୍ରୀ ଆଉ ଏକ ଭିଡ଼ିଓରେ ଆମ ଗାଁ ଆମ ବିକାଶ କାର୍ଯ୍ୟରେ ବିଲ କରିବାକୁ ନେଇ ପିସି ମାଗୁଥିବା ଦେଖାଯାଉଛି । ଯାହାକୁ ନେଇ ସବୁଠି ଚର୍ଚ୍ଚା ଜୋର ଧରିଛି ।
ତେବେ ଭିଡିଓରେ ସଂପୃକ୍ତ ଦୁଇ ଯନ୍ତ୍ରୀଙ୍କ ପ୍ରତିକ୍ରିୟା ମିଳିପାରି ନାହିଁ । ଏନେଇ ଭାଇରାଲ ଭିଡିଓକୁ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଆରଡିଏର ଯୋଜନା ନିର୍ଦ୍ଦେଶକ ଡ. ଉଦ୍ଧବ ଚନ୍ଦ୍ର ମାଝୀ ପ୍ରକାଶ କରିଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
