ଆନନ୍ଦପୁର: ଯୋଗାଯୋଗ ପାଇଁ କେବଳ ଗୋଟିଏ ହିଁ ରାସ୍ତା। ଲଗାଣ ବର୍ଷା ଯୋଗୁଁ ଗତ ଦେଢ ମାସ ତଳେ ପୋଲଟି ସମ୍ପୂର୍ଣ୍ଣ ଧୋଇଯାଇଥିଲା । କେନ୍ଦୁଝର ଜିଲ୍ଲା ଘସିପୁରା ବ୍ଲକ ଅନ୍ତର୍ଗତ ବସନ୍ତପୁରା, ରଙ୍ଗମାଟିଆରୁ ରାଇଘାଟି ଗ୍ରାମକୁ ଯିବା ପାଇଁ ଏକ ମାତ୍ର ରାସ୍ତାରେ ଉପରେ ଦୁଇଟି ଗାଁ ଲୋକେ ନର୍ଭରଶୀଳ। କୌଣସି ଜରୁରୀ କାଳିନ ସେବା ଗ୍ରାମକୁ ଆସିପାରୁନାହିଁ ।
ଘସିପୁରା ବ୍ଲକ ଅନ୍ତର୍ଗତ ବସନ୍ତପୁରା, ରଙ୍ଗମାଟିଆରୁ ରାଇଘାଟି ଗ୍ରାମକୁ ଯିବା ପାଇଁ ଏକମାତ୍ର ରାସ୍ତା ରହିଛି । ଫଳରେ ଗ୍ରାମବାସୀ ଅନ୍ୟ ଉପାୟ ନ ପାଇ ନାଳରେ ପାର ହୋଇ ଯିବାଆସିବା କରୁଛନ୍ତି । ଅନେକ ଦାବି ପରେ ୨୭ ଲକ୍ଷ ଟଙ୍କାରେ ନିର୍ମିତ ହୋଇଥିଲା ପୋଲ। ଯନ୍ତ୍ରୀଙ୍କ ଦୂରଦୃଷ୍ଟି ଅଭାବ ଓ ଠିକାଦାରଙ୍କ ଲାଭଖୋର ମନୋଭାବ ଯୋଗୁଁ ଲଗାଣ ବର୍ଷାରେ ସମ୍ପୂର୍ଣ୍ଣ ଭାବରେ ଧୋଇଗଲା ପୋଲ ଓ ରାସ୍ତା। ଫଳରେ ରାସ୍ତାଟିର ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡିଥିଲା। ଏହାଦ୍ବାରା କୌଣସି ଜରୁରୀ ସେବା ଗାଡ଼ି ଗୁଡିକ ଗାଁ ମଧ୍ୟକୁ ଯାଇପାରୁନାହିଁ ଏବଂ ଆବାସ ହିତାଧିକାରୀମାନେ ଘର ତିଆରି ସାମଗ୍ରୀ ମଧ୍ୟ ଗାଡ଼ିରେ ଆଣି ପାରୁନାହାଁନ୍ତି ବୋଲି ଅଭିଯୋଗ କରିଛନ୍ତି ଗ୍ରାମବାସୀ।
ତୁରନ୍ତ ସମସ୍ୟାର ସମାଧାନ କରାନଗଲେ ଆଗାମୀ ଦିନରେ ଜନ ଆନ୍ଦୋଳନ ମୁଣ୍ଡ ଟେକିବ ବୋଲି କହିଛନ୍ତି ଗ୍ରାମବାସୀ ।ଗ୍ରାମକୁ ଗୋଟିଏ ରାସ୍ତା ହୋଇଥିବାରୁ ପୋଲ ଭାଙ୍ଗିଯିବା ଫଳରେ ବହୁ ଅସୁବିଧା ହେଉଥିବାବେଳେ ଗୋଟିଏ ବଡ଼ ପୋଲ ପାଇଁ ଲୋକଙ୍କର ଦାବି ହେଉଛି । ଏବିଷୟରେ ଘସିପୁରା ବିଡ଼ିଓଙ୍କୁ ପଚାରିବାରୁ ସେ ଜାଣିନଥିବାବେଳେ ଆମ ପାଖରୁ ଖବର ପାଇଲେ ଏବଂ ତୁରନ୍ତ ସମସ୍ୟାର ସମାଧାନ କରାଯିବ ବୋଲି କହିଛନ୍ତି।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
