କେନ୍ଦୁଝର: କେନ୍ଦୁଝର ଟ୍ରକ ମାଲିକ ସଙ୍ଘ ରାଜ୍ୟରେ ବିତ୍ତଶାଳୀ ଟ୍ରକ ସଙ୍ଘ ରୂପେ ପରିଚିତ । ଏହି ଟ୍ରକ ସଂଘରେ ତ୍ରୁଟିପୂର୍ଣ୍ଣ ପରିଚାଳନା ଓ ଅନିୟମିତତା ନେଇ ବାରମ୍ବାର ଅଭିଯୋଗ ହୋଇ ଆସୁଛି । ଗତ କିଛି ଦିନ ହେଲା ରାମଚନ୍ଦ୍ରପୁର ଯୋନର କର୍ମକର୍ତ୍ତାଙ୍କୁ ଆସୋସିଏସନ ପକ୍ଷରୁ ପାତରଅନ୍ତର କରୁଥିବା ଅଭିଯୋଗ ହୋଇଛି ।
ସଙ୍ଘ ଉକ୍ତ ଯୋନର ଟ୍ରକ ମାଲିକଙ୍କୁ ଟୋକନ ଦେବାରେ ଅନିୟମିତତା କରୁଥିବା ଅଭିଯୋଗ କରିଛନ୍ତି କିଛି ମାଲିକ । ଏନେଇ ଆଜି(ସୋମବାର) ଶତାଧିକ ଟ୍ରକ ମାଲିକ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି । କିଛି ସଙ୍ଘ କର୍ମକର୍ତ୍ତା ନିଜସ୍ୱ ଲାଭଖୋର ମନବୃତ୍ତି ପାଇଁ ଶହ ଶହ ଗାଡି ମାଲିକଙ୍କ ପେଟ ପାଟଣାକୁ ନେଇ ହଇରାଣ କରୁଥିବା ଜିଲ୍ଲାପାଳଙ୍କୁ ଅବଗତ କରିଥିଲେ ମାଲିକ ମାନେ । ପରେ ଆରକ୍ଷୀ ଅଧିକ୍ଷକ ଓ ଟ୍ରକ ମାଲିକ ସଙ୍ଘ କାର୍ଯ୍ୟାଳୟ ଯାଇ ଅଭିଯୋଗ ପତ୍ର ଦେଇଥିଲେ । ଆଗାମୀ ଦିନରେ ସଙ୍ଘ କର୍ମକର୍ତ୍ତା ପାତର ଅନ୍ତର ମନବୃତି ଛାଡି ମାଲିକଙ୍କ ସ୍ୱାର୍ଥକୁ ଯଦି ପ୍ରଧାନ୍ୟ ନଦେବେ ଶତାଧିକ ମାଲିକ ରାଜରାସ୍ତାକୁ ଆସିବେ ବୋଲି ଚେତାବନୀ ଦେଇଛନ୍ତି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
