କେନ୍ଦୁଝର: ଶୁଖିଲା ଗଛଡାଳ ପଡି ଦୁଇ ବାଇକ ଆରୋହୀ ଗୁରୁତର ହୋଇଛନ୍ତି । ଯାହାର ଭିଡିଓ ସିସିଟିଭିରେ କଏଦ ହୋଇଛି । କେନ୍ଦୁଝର ଜିଲ୍ଲାର ଝୁମ୍ପୁରା ବଜାର ନିକଟରେ ଘଟିଛି ଏ ଅଘଟଣ । ସୂଚନା ଅନୁସାରେ, ଝୁମ୍ପୁରା ବଜାର ଥାନା ନିକଟସ୍ଥ ରାସ୍ତାରେ ଲୋକ ଯିବା ଆସିବା କରୁଥିଲେ । ଏହି ସମୟରେ ରାସ୍ତା କଡରେ ଥିବା ଏକ ଆମ୍ବ ଗଛର ଶୁଖିଲା ବଡ଼ ଡାଳଟେ ହଠାତ ଯାତ୍ରୀଙ୍କ ଉପରେ ଖସି ପଡ଼ିଥିଲା । ଫଳରେ ଚାରି ଜଣ ସାମାନ୍ୟ ଆହତ ହୋଇଥିବା ବେଳେ ବାଇକରେ ଯାଉଥିବା ସ୍ୱାମୀ ସ୍ତ୍ରୀ ଗୁରୁତର ହୋଇଥିବା ଜଣାପଡିଛି ।
ଗୁରୁତରଙ୍କୁ ଉଦ୍ଧାର କରି ସ୍ଥାନୀୟ ଲୋକେ ଝୁମ୍ପୁରା ମେଡିକାଲକୁ ନେଇଯାଇଥିବା ଜଣାପଡିଛି । ଏହି ଭଳି ଶୁଖିଲା ଗଛ ଗୁଡିକୁ ରାସ୍ତା କଡ଼ରୁ କାଟିବା ପାଇଁ ସ୍ଥାନୀୟ ବାସିନ୍ଦା ଦାବି କରିଥିଲେ ମଧ୍ୟ ପ୍ରଶାସନ ପକ୍ଷରୁ କୈଣସି ପଦକ୍ଷେପ ନିଆଯାଇନଥିଲା । ଏହି ଘଟଣା ପରେ ଖୁବଶୀଘ୍ର ଏଭଳି ଗଛ ଖୋଜି କାଟିବାକୁ ସ୍ଥାନୀୟ ସ୍ୱେଚ୍ଛାସେବୀ ଦାବି କରିଛନ୍ତି । ଡାଳ ବାଟୋଇଙ୍କ ଉପରେ ଖସିବାର ଏ ଭିଡିଓ ସ୍ଥାନୀୟ ଦୋକାନ ସମ୍ମୁଖରେ ଲାଗିଥିବା ସିସିଟିଭିରେ କଏଦ ହୋଇଥିବା ବେଳେ ଏହା ଭାଇରାଲ ହେବାରେ ଲାଗିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
