କେନ୍ଦୁଝର: ମଣିଷ ଯାଇ ଚନ୍ଦ୍ରପୃଷ୍ଠରେ ପହଁଞ୍ଚି ସାରିଛି । ବିଜ୍ଞାନ ଆଜି ସମସ୍ତ ଅସମ୍ଭବକୁ ସମ୍ଭବ କରିଛି । କିନ୍ତୁ ଆଜି ବି ଅନେକ ଲୋକ ଅନ୍ଧବିଶ୍ବାସର ଅନ୍ଧକାର ତଳେ କାଳାତିପାତ କରୁଛନ୍ତି । ଜିଲ୍ଲାର କିଛି ଆଦିବାସୀ ଲୋକ ଅନ୍ଧବିଶ୍ବାସର ବଶବର୍ତ୍ତୀ ହୋଇ ଡାକ୍ତରଙ୍କ ବଦଳରେ ଗୁଣିଆକୁ ବିଶ୍ବାସ କରୁଥିବା ଦେଖିବାକୁ ମିଳିଛି । ଏଭଳି ଘଟଣା ଦେଖିବାକୁ ମିଳିଛି କେନ୍ଦୁଝରର ବାଂଶପାଳ ବ୍ଲକ ଅଧିନସ୍ଥ କାଦକଳା ପଞ୍ଚାୟତର ଉପର କାଦକଳା ଗ୍ରାମରେ ।
ଉକ୍ତ ଗ୍ରାମର ବାନ୍ଦୁରୁ ମୁଣ୍ଡାଙ୍କ ସ୍ତ୍ରୀ ସୂର୍ଯ୍ୟମଣି ମୁଣ୍ଡାଙ୍କୁ ସପ୍ତାହେ ହେଲା ଜ୍ଵର ହେଉଥିବା ବେଳେ ପରିବାର ଲୋକେ କେନ୍ଦୁଝର ଡାକ୍ତରଖାନା ନେଇ ଚିକିତ୍ସା କରାଉଥିଲେ । ସେଠାରେ ୩-୪ ଦିନ ଚିକିତ୍ସା ହେବା ପରେ ମଧ୍ୟ ସୂର୍ଯ୍ୟମଣି ଭଲ ନହେବାରୁ କେହି ଗୁଣିଗାରେଡି କରିଛି ଭାବି ଘରକୁ ଫେରାଇ ଆଣିଥିଲେ ପରିବାର ଲୋକେ । ଘରକୁ ଫେରାଇ ନେବା ସହ ଗୁଣିଆ ଡାକି ଝଡାଫୁଙ୍କା କରିବା ଆରମ୍ଭ କରିଥିଲେ। ତେବେ ଉପର କାଦକଳାକୁ ରାସ୍ତା ନଥିବାରୁ ତଳ କାଦକଳାରୁ ଉପର କାଦକଳାକୁ ୫ କିମି ଭାର ସାହାଯ୍ୟରେ ରୋଗୀକୁ ବୋହି ନେଇଥିବା ଜଣାପଡ଼ିଛି।
ଏପେଟେ ସରକାରୀ ମେଡିକାଲରେ ଅବହେଳା ସାଙ୍ଗକୁ ସରକାରୀ ସଚେତନତା ସୃଷ୍ଟିକୁ ଦୃଢ଼ୀଭୂତ କରିବା ଉପରେ ଜୋର ଦେଇଛନ୍ତି ସ୍ବେଚ୍ଛାସେବୀ । ତେବେ ଏନେଇ ଜିଲ୍ଲା ଚିକିତ୍ସା ଅଧିକାରୀଙ୍କ କୌଣସି ପ୍ରତିକ୍ରିୟା ମିଳିପାରି ନାହିଁ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
