ଆନନ୍ଦପୁର: ବଦଳୁଛି ସମୟ । ବଦଳୁଛି ବାପା ମା’ଙ୍କ ପ୍ରତି ପିଲାମାନଙ୍କ ଭାବନା । ସାମାନ୍ୟ ସ୍ବାର୍ଥ ପାଇଁ ବୁଢା ବାପା ମା’ଙ୍କୁ ଗାଳି ଗୁଲଜ କରିବା ସହ ବିଲରେ ଗଡେଇ ତଡେଇ ମାରିଛନ୍ତି ନୃଶଂସ ପୁଅ ଓ ବୋହୂ । ଘଟଣାଟି ହେଉଛି ଘଷିପୁରା ଥାନା ଧକୋଠା ପଞ୍ଚାୟତ କୁଣ୍ଡାକୋଟ ଗ୍ରାମର ।
ସୂଚନା ଅନୁଯାୟୀ ଗ୍ରାମର ନାରାୟଣ ଖିଲାର(75) ଓ ପତ୍ନୀ ସତ୍ୟଭାମା ରବିବାର ବିଲରେ ତଳି ରୋଉବାକୁ ଯାଇଥିଲେ । ହେଲେ ସାମାନ୍ୟ ସ୍ବାର୍ଥରୁ ପୁଅ ଅକ୍ଷୟ ଓ ବୋହୂ ଡଲି ସେହି ସମୟରେ ବିଲରେ ପହଞ୍ଚି ବାପା ମା’ଙ୍କୁ ଗାଳିଗୁଲଜ କରିବା ଆରମ୍ଭ କରିଥିଲେ । ହେଲେ ବାପା ମା’ ଏହାକୁ ପ୍ରତିବାଦ କରିବାରୁ ଆରମ୍ଭ ହୋଇଥିଲା ଅତ୍ୟାଚାର । ବିଲରେ ଗଡେଇ ତଡେଇ ବାପା ମା’ଙ୍କୁ ମାରିଥିଲେ ଉଭୟ ପୁଅ ଓ ବୋହୂ ।
କେବଳ ସେତିକି ନୁହେଁ, ବିଲରେ କାଦୁଅ ପକାଇବା ସହ ନାରାୟଣଙ୍କ ଛାତି ଉପରେ ଛିଡା ହୋଇଯାଇଥିଲା ପୁଅ ଅକ୍ଷୟ । ତେବେ ଉଭୟ ବାପା ମା’ଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଉଦ୍ଧାର କରିଥିଲେ । ପରେ ଏସମ୍ପର୍କରେ ଘଷିପୁରା ଥାନାରେ ଅଭିଯୋଗ କରିବା ପରେ ପୋଲିସ ଆରମ୍ଭ କରିଛି ତଦନ୍ତ ।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
