କେନ୍ଦୁଝର: ଆଉ ଦିନକ ପରେ ସ୍ବାଧୀନତା ଦିବସ ପାଳିବ ସାରାଦେଶ । କୋରୋନା ଲଢେଇ ମଧ୍ୟରେ ରାଜ୍ୟରେ ସ୍ବାଧୀନତା ଦିବସ ପାଳନ ପାଇଁ ଚାଲିଛି ପ୍ରସ୍ତୁତି । ଚଳିତବର୍ଷ କୋରୋନା ମହାମାରୀ ପାଇଁ ସବୁଠି କଟକଣା ଜାରି ହୋଇଥିବାବେଳେ ସବୁବର୍ଷ ପରି ବ୍ୟାପକ ଭାବେ ଜିଲ୍ଲାସ୍ତରୀୟ ସ୍ବାଧୀନତା ଦିବସ ଧୁମଧାମରେ ପାଳିତ ହୋଇପାରିବ ନାହିଁ ବୋଲି ଜିଲ୍ଲା ପ୍ରଶାସନ ପକ୍ଷରୁ ଜଣାପଡ଼ିଛି ।
ଚଳିତବର୍ଷ ୭୪ତମ ସ୍ବାଧୀନତା ଦିବସ ପାଳିବାକୁ ପ୍ରଶାସନ ପକ୍ଷରୁ ମଧ୍ୟ ବ୍ୟାପକ ବ୍ୟବସ୍ଥା ଗ୍ରହଣ କରାଯାଉଛି । କେନ୍ଦୁଝର ଷ୍ଟାଡିୟମରେ ସୀମିତ ସଂଖ୍ୟକ ପୋଲିସ ବାହିନୀକୁ ନେଇ ଏହି ଦିବସ ପାଳିତ ହେବ । ଆଜି ଏଥିପାଇଁ ପୋଲିସ ବାହିନୀ ପକ୍ଷରୁ ପ୍ରାକ୍ଟିସକୁ ଚୂଡାନ୍ତ କରାଯାଇଛି । ୨ ଏସଏସବିଏନ, ରିଜର୍ଭ ପୋଲିସ ବାହିନୀ ଓ ପୋଲିସ ବ୍ୟାଣ୍ଡକୁ ନେଇ ପ୍ରାକ୍ଟିସ କରାଯାଇଥିଲା ।
ଏହି ଜିଲ୍ଲାସ୍ତରୀୟ ସ୍ଵାଧୀନତା ଦିବସରେ ସାଧାରଣ ଲୋକ ଓ ଛାତ୍ରଛାତ୍ରୀଙ୍କୁ ଚଳିତବର୍ଷ ବାରଣ କରାଯାଇଛି । ମାତ୍ର ସ୍ବଳ୍ପ ସଂଖ୍ୟକ ପ୍ରଶାସନିକ ଅଧିକାରୀ ଓ ପୋଲିସକୁ ନେଇ ଏହି କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି ଜଣାପଡିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
