କେନ୍ଦୁଝର: ପଞ୍ଚାୟତ ନିର୍ବାହୀ ଅଧିକାରୀଙ୍କ ଆନ୍ଦୋଳନ ୧୯ ଦିନରେ ପହଞ୍ଚିଛି । ଦୁଇ ଦଫା ଦାବି ନେଇ ଗତ ଅଗଷ୍ଟ ୧୮ ତାରିଖ ଠାରୁ ନିଖିଳ ଉତ୍କଳ ପଞ୍ଚାୟତ ନିର୍ବାହୀ ଅଧିକାରୀ ରାଜ୍ୟ ସଂଘର ଡାକରାରେ କେନ୍ଦୁଝର ଜିଲ୍ଲା ପଞ୍ଚାୟତ ନିର୍ବାହୀ ଅଧିକାରୀ ସଂଘ ଆନ୍ଦୋଳନ କରୁଛି । ଆନ୍ଦୋଳନକୁ ୧୯ ଦିନ ବିତିଯାଇଥିଲେ ମଧ୍ୟ ସରକାର ଏମାନଙ୍କ ପ୍ରତି କୌଣସି ପଦକ୍ଷେପ ନେଉନଥିବା ସଂଘ ଅଭିଯୋଗ କରିଛି ।
ଗ୍ରାମପଞ୍ଚାୟତର ମୁଖ୍ୟ ଭାବରେ ପଞ୍ଚାୟତ ନିର୍ବାହୀ ଅଧିକାରୀ ତୃଣମୂଳ ସ୍ତରରେ କାର୍ଯ୍ୟ ସଞ୍ଚାଳକ ଓ ସମ୍ପାଦନ କରୁଛନ୍ତି । ଗ୍ରାମାଞ୍ଚଳରେ କାର୍ଯ୍ୟକ୍ଷମ 14 ବିଭାଗର 29 ଟି ଦାୟିତ୍ଵ ଗ୍ରାମପଞ୍ଚାୟତକୁ ହସ୍ତାନ୍ତର କରାଯାଇଥିବା ବେଳେ ପିଇଓଙ୍କୁ ଅଣଦେଖା କରାଯାଉଥିବା ଅଭିଯୋଗ ହୋଇଛି । ଦାରିଦ୍ର୍ୟ ଦୂରୀକରଣ ଯୋଜନା, ମୋ ଘର ଯୋଜନା, ଏମଜିଏନଆରଜିଏ , ସିସି ରୋଡ ଆଦି ଯୋଜନାକୁ ଜୀବନ ବିପନ୍ନ କରି ପଞ୍ଚାୟତ ନିର୍ବାହୀ ଅଧିକାରୀ ମାନେ ସମ୍ପାଦନ କରି ଆସୁଛନ୍ତି । ଏହି ସବୁ କାର୍ଯ୍ୟ କରୁଥିବା ସମୟରେ ସାମାନ୍ୟ ଭୁଲ ହେଲେ ପଞ୍ଚାୟତ ଅଧିକାରୀଙ୍କ ପ୍ରତି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । କିନ୍ତୁ ସରକାର ଏହି ଅଧିକାରୀଙ୍କ କୌଣସି ଦାବିକୁ ଗ୍ରହଣ କରିବାକୁ ରାଜି ହେଉନଥିବା ଅଭିଯୋଗ କରିଛନ୍ତି ସଂଘର ସଦସ୍ୟ ।
