କେନ୍ଦୁଝର: ବୃଦ୍ଧଙ୍କୁ ଦଳିଦେଲା ଦନ୍ତା । କେନ୍ଦୁଝର ଜିଲ୍ଲା ତେଲକୋଇ ଥାନା ଅନ୍ତର୍ଗତ ବନବିହାରୀପୁର ଗ୍ରାମରେ ଏପରି ଅଭାବନୀୟ ଘଟଣା ଦେଖିବାକୁ ମିଳିଛି । ମୃତକଜଣକ ତେଲକୋଇ ଥାନା କୁଲାଡେରା ଗ୍ରାମର ନିଧିଆ ନାୟକ ବୋଲି ଜଣାପଡିଛି । ନିଧିଆଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲେ ସୁଦ୍ଧା ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି ।
ସୁଚନା ଅନୁସାରେ ଆଜି (ବୁଧବାର) ସକାଳେ ନିଧିଆ ବଳଦ ଖୋଜିବାକୁ ଯାଇଥିବା ବେଳେ ବନବିହାରୀପୁର କାଜୁ ପଡି଼ଆରେ ଗୋଟିଏ ଦନ୍ତାହାତୀ ତାଙ୍କୁ ଶୁଣ୍ଢରେ କଚାଡି଼ ଦେଇଥିଲା । ପ୍ରଥମେ ତାଙ୍କୁ ତେଲକୋଇ ଡାକ୍ତରଖାନାରେ ଓ ପରେ ଅବସ୍ଥା ସଙ୍କଟାପନ୍ନ ହେବାରୁ କେନ୍ଦୁଝର ଜିଲ୍ଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ସେଠାରେ ତାଙ୍କର ମୃତ୍ୟୁ ଘଟିଥିଲା ।
ତେବେ ଉକ୍ତ ସ୍ଥାନରେ ହାତୀ ମଣିଷ ଲଢ଼େଇ କିଛି ନୂଆ କଥା ନୁହେଁ । ସ୍ଥାନୀୟ ଅଞ୍ଚଳରେ ଗତ ୧୦ଦିନରେ ହାତୀ ଆକ୍ରମଣରେ ୨ ଜଣଙ୍କ ମୃତ୍ୟୁ ଘଟିବାରୁ ଉତ୍ତେଜନା ପ୍ରକାଶ ପାଇଛି । ଉତ୍ତ୍ୟକ୍ତ ଲୋକେ ହାତୀ ଘଉଡାଇବା ଦାବିରେ ବନ ବିଭାଗ କର୍ମଚାରୀଙ୍କୁ ୩ ଘଣ୍ଟା ଅଟକ ରଖିଥିଲେ ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
