ଆନନ୍ଦପୁର: ଲଗାଣ ବର୍ଷାରେ ଧାନ ଫସଲରେ କ୍ଷତି ସହିବା ପରେ କ୍ଷତି ଭରଣା କରିବାକୁ ମୁଗ ଚାଷ କରିଥିଲେ ଚାଷୀ । ହେଲେ ଦଇବ ଦାଉ ସାଧିଲା । ଏପରି କିଛି ମୁଗ ଚାଷୀଙ୍କ ଦୁଃଖଭରା କାହାଣୀ ଦେଖିବାକୁ ମିଳିଛି ଆନନ୍ଦପୁର ଉପଖଣ୍ଡର ତରିମୂଳ ଗାଁରେ ।
କେନ୍ଦୁଝର ଜିଲ୍ଲା ଘଷିପୁରା ବ୍ଲକର ତରିମୂଳ ଗାଁ । ଏହି ଗାଁରେ ୪୦୦ ରୁ ଊର୍ଦ୍ଧ୍ବ ସଭିଏଁ ଚାଷୀ ପରିବାର । ଶୀତ- କାକର-ଖରା-ବର୍ଷାକୁ ଖାତିର ନକରି ଚାଷ କାମରେ ଲାଗିଥାନ୍ତି ଏହି ଲୋକମାନେ । ଗତବର୍ଷର ଫନି ମହାବାତ୍ୟା ଧାନ ଓ ଅନ୍ୟାନ୍ୟ ଫସଲକୁ ଧ୍ବଂସ କରି ଦେଇଥିବାବେଳେ ଏଥର ମଧ୍ୟ ଚାଷୀକୁ ହତାଶ ହେବାକୁ ପଡିଛି । ଏବର୍ଷ ଅଦିନିଆ ଝଡବର୍ଷା ଧାନ ଫସଲକୁ ନଷ୍ଟ କରି ଦେଇଥିବା ବେଳେ ଚାଷୀମାନଙ୍କୁ ଅନେକ କ୍ଷତି ସହିବାକୁ ପଡିଥିଲା । ଏସବୁକୁ ପଛରେ ପକାଇ ମୁଗ ଚାଷରୁ ଦି ପଇସା ରୋଜଗାରର ଆଶା ରଖିଥିବା ଚାଷୀକୁ କାଳବୈଶାଖୀର ପ୍ରଭାବ ଓ ଅଦିନିଆ ଝଡବର୍ଷା ପୁଣି ପାହାର ଦେଇଛି ।
ଲକଡାଉନର ପ୍ରଭାବରେ ଶ୍ରମିକଙ୍କ କାମ ବନ୍ଦ ଥିବା ବେଳେ ଚାଷୀ ପରିବାରଟି ନିଜ ଛୁଆ ପିଲା କୁଟୁମ୍ବଙ୍କୁ ଧରି ଚାଷ କାମକୁ ବଢେଇଥିଲା । କ୍ଷୁଦ୍ର ଚାଷୀଟିଏ ମଧ୍ୟ ଏକର ଏକର ଜମିରେ ସୁନ୍ଦର ମୁଗ ଫସଲକୁ ଦେଖି ଆତ୍ମବିଭୋର ହେଉଥିଲା କିନ୍ତୁ ଜଳବାୟୁର ତାଡନାରେ ମୁଗ ଫସଲ କ୍ଷେତରେ ପଡି ପଚି ଯାଇଛି ତ ଅନ୍ୟ କେତେକ ଗଜା ହୋଇଯାଇଛି ।
ତେବେ ହତାଶ ହୋଇପଡିଥିବା ଏଇ କ୍ଷୁଦ୍ର ଚାଷୀ ମାନଙ୍କର କ୍ଷତି ଭରଣା କରିବା ପାଇଁ ସ୍ଥାନୀୟ ଅଞ୍ଚଳରେ ଦାବି ହେଉଛି ।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
