କେନ୍ଦୁଝର: ଜିଲ୍ଲାର ବାଂଶପାଳ ବ୍ଲକ କାଞ୍ଜିପାଣି ଥାନା ଅନ୍ତର୍ଗତ କୁଆଁର ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଝିଅ ଘରକୁ ସାଦ ଖୁଆଇବା ପାଇଁ ଯାଉଥିବା ବେଳେ ଏହି ଦୁର୍ଘଟଣା ଘଟି 20ରୁ ଊର୍ଦ୍ଧ୍ବ ଆହତ ହୋଇଥିବାବେଳେ ସେମାନଙ୍କ ମଧ୍ୟରୁ 3 ଜଣ ଗୁରୁତର ରହିଛନ୍ତି ।
ଝିଅଘରକୁ ସାଦ ନେଇ ଯିବାବେଳେ ଅଘଟଣ: ପିକଅପ ଓଲଟି 20 ଆହତ, 3 ଗୁରୁତର
ମିଳିଥିବା ସୂଚନା ଅନୁସାରେ ହଲଦୀପାଣି ଗ୍ରାମର କିଛି ଲୋକ ସଦର ବ୍ଲକର ବରଦାପାଳ ଗ୍ରାମରେ ଥିବା ଝିଅ ଘରକୁ ସାଦ ଖୁଆଇବା ପାଇଁ ଏକ ପିକଅପରେ ଯାଉଥିଲେ । ତେବେ କୁଆଁର କଲୋନୀ ଛକ ନିକଟରେ ଗାଡିଟି ଭାରସାମ୍ୟ ହରାଇ ଓଲଟି ପଡିଥିଲା । ଏଥିରେ ଥିବା ୨୦ରୁ ଊର୍ଦ୍ଧ୍ବ ଲୋକ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ 3 ଜଣ ଗୁରୁତର ଥିବା ଜଣାପଡିଛି ।
ସମସ୍ତଙ୍କୁ ବାଂଶପାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିବାବେଳେ ଗୁରୁତର 3 ଜଣଙ୍କୁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ପଠାଯାଇଛି । ଘଟଣାସ୍ଥଳରେ ପୋଲିସ ପହଞ୍ଚି ଅଧିକ ତଦନ୍ତ ଆରମ୍ଭ କରିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
