ଆନନ୍ଦପୁର: କେନ୍ଦୁଝର ଜିଲ୍ଲା ଆନନ୍ଦପୁରରେ ଭିନ୍ନ ଢଙ୍ଗରେ ପାଳିତ ହୋଇଛି କୁମାର ପୂର୍ଣ୍ଣିମା। କେବଳ ଭଲ ବର ପାଇବା ପାଇଁ ନୁହେଁ ବରଂ ପରିବାରର ସମସ୍ତ ସଦସ୍ୟଙ୍କ ଶୁଭକାମନା କରି ଏହି ଓଷା କେଉଁ ଗ୍ରାମରେ ପାଞ୍ଚଦିନ ତ କେଉଁଠି ଆଠ ଦିନ ପାଳିତ ହୋଇଛି । ପରିବାରର ସମସ୍ତ ସଦସ୍ୟଙ୍କ ପାଇଁ ଖଡିରେ ନିର୍ମିତ ଛଟରକୁ ଚଉରାରେ ପୂଜା କରାଯାଇଛି।
ଶେଷ ଦିନ ସନ୍ଧ୍ୟାରେ ଝିଅମାନେ ସଜବାଜ ହୋଇ ଚଉରାକୁ କଇଁ ଫୁଲରେ ସଜାଇବା ସହ ଚନ୍ଦ୍ରକୁ ବନ୍ଦାପନା କରି ଖାଡିରେ ନିର୍ମିତ ଛତାକୁ ପାଣିରେ ପକାଇଛନ୍ତି । ଏଇ ଆଠ ଦିନରେ ଝିଅମାନେ ଆମିଷ ଖାଇନଥାନ୍ତି। ଶେଷ ଦିନ ସକାଳୁ ଫୁଲ ତୋଳି ଚଉରାକୁ ସୁନ୍ଦର ଭାବରେ ସଜାଇଥାନ୍ତି। ଗାଧୋଇ ସୂର୍ଯ୍ୟଙ୍କୁ ଅଘ୍ୟ ଦେଇ ଦିନଯାକ ଉପବାସ କରିଥାନ୍ତି। ସନ୍ଧ୍ୟାରେ ଚାନ୍ଦ ଆସିଲେ ବନ୍ଦାପନା କରି ଭୋଗ ପାଇଥାନ୍ତି।
ତେବେ କୁମାର ପୂର୍ଣ୍ଣିମାରେ ବାଙ୍ଖିଡି ଗ୍ରାମର ଝିଅମାନେ ନିଆରା ଢଙ୍ଗରେ ପାଳିଛନ୍ତି । ଗାଁର ବିଭିନ୍ନ ସାହି ମାନଙ୍କରେ ଚଉରାକୁ ସଜାଇ ପୂଜା କରିବା ସହ ରାତି ସାରା ଉଜାଗର ରହି ଫୁଲବଉଳବେଣୀ ଗୀତ ବୋଲିଛନ୍ତି। ଦୀର୍ଘ 8ଦିନ ଧରି ଆନନ୍ଦଉଲ୍ଲାସର ଏହି ପର୍ବ ପାଳିତ ହେଉଥିବାବେଳେ କୁମାରୀ ମାନେ ଖୁବ୍ ମଜା ମଉଜ କରିଥାନ୍ତି।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
