ଆନନ୍ଦପୁର: ଦେଶରେ ପ୍ରତି କିଛି ସମୟର ବ୍ୟବଧାନରେ କୋରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି । ଯାହାକୁ ନେଇ ସରକାର ଚିନ୍ତିତ ଥିବାବେଳେ ସମସ୍ତ ସ୍ବାସ୍ଥ୍ୟକର୍ମୀ ମାନେ ଆକ୍ରାନ୍ତଙ୍କ ଚିକିତ୍ସାରେ ଦିନ ରାତି ଲାଗି ପଡିଛନ୍ତି । ଏଭଳି ପରିସ୍ଥିତିରେ ଦେଶର ଚାରି ଆଡୁ ସହଯୋଗର ହାତ ବଢିଛି । ଅନେକ ସ୍ଥାନରେ କୁନି କୁନି ପିଲା ମାନେ ମଧ୍ୟ ସେମାନଙ୍କ ପକେଟ ମନିରୁ ସଞ୍ଚୟ କରି ରଖିଥିବା ଟଙ୍କା ପ୍ରଧାନମନ୍ତ୍ରୀ କିମ୍ବା ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ଦାନ କରୁଥିବା ଦୃଷ୍ଟି ଗୋଚର ହୋଇଛି ।
ସେହିଭଳି ଜଣେ କୁନି ଛୁଆ ହେଉଛନ୍ତି କେନ୍ଦୁଝର ଆନନ୍ଦପୁର ଉପଖଣ୍ଡ ରାମଚନ୍ଦ୍ରପୁର ଗାଁର , ଇଂଜିନିୟର ପାର୍ଥସାରଥୀ ରାଉତଙ୍କ ପୁଅ ଇସାନ କିସନ । ଇସାନ 4ର୍ଥ ଶ୍ରେଣୀରେ ପାଠ ପଢୁଥିବାବେଳେ ନିଜ ପକେଟ ଖର୍ଚ୍ଚରୁ ସଞ୍ଚିତ ଅର୍ଥକୁ କୋରୋନା ସହାୟତା ପାଇଁ ଦାନ କରିଛନ୍ତି ।
ଆଜି(ସୋମବାର) କୋରୋନା ଇସାନ ଏହି ଅର୍ଥକୁ ଘସିପୁରା ବିଧାୟକ ବଦ୍ରିନାରାୟଣ ପାତ୍ରଙ୍କୁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରେ ଜମା କରିବାକୁ ପ୍ରଦାନ କରିଛନ୍ତି । ଏଥିସହ ତାଙ୍କ ପିତା ପାର୍ଥ ସାରଥୀ ମଧ୍ୟ ୧୦ ହଜାର ଟଙ୍କା ଚେକ ପ୍ରଦାନ କରିଛନ୍ତି । ତେବେ ଏହି କୁନି ପିଲାଟିର ଏପରି ମନୋଭାବକୁ ନେଇ ବେଶ ପ୍ରଶଂସା କରାଯାଇଛି ।
ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ, ଇଟିଭି ଭାରତ
