କେନ୍ଦୁଝର: ଗାଁର ବିକାଶ ନେଇ ସରକାର ଦେଖାଇଛନ୍ତି ଅନେକ ସ୍ବପ୍ନ । ହେଲେ ସେହି ସ୍ବପ୍ନ ଏହି ଅଞ୍ଚଳବାସୀଙ୍କ ପାଇଁ ଏବେ ବି ସ୍ବପ୍ନ । ଏହି ଗାଁକୁ ଯିବା ପାଇଁ ନା ଅଛି ଭଲ ରାସ୍ତା ନା ଅଛି ଗାଁରେ ପିଇବା ପାଣି । ଏ ହେଉଛି ସଦର ବ୍ଲକ ଅନ୍ତର୍ଗତ ଘୁଟୁରୁ ମୁଣ୍ଡା ସାହିର । ଏହି ଗ୍ରାମଟି କେନ୍ଦୁଝର ଜିଲ୍ଲାଠାରୁ ମାତ୍ର 5 କିଲୋମିଟର ଦୂର । ହେଲେ ସ୍ବାଧୀନତାର 73 ବର୍ଷ ପରେ ବି ପରାଧିନ ହୋଇ ରହିଛି ଏହି ଗାଁ ।
ଗାଁକୁ ଯିବାକୁ ହେଲେ ଅତିକ୍ରମ କରିବାକୁ କାଦୁଅ ପଚ ପଚ ରାସ୍ତା । ପିଇବା ପାଇଁ ପାଣି ଅପ୍ରାପ୍ୟ । ତେଣେ ଅଙ୍ଗନବାଡି ଘର ବି ଭଡା ଘରେ ଚାଲିଛି । ଯାହା ପାଖରେ ରହିଛି ଏକ ପୋଖରୀ । ପିଲାମାନେ ସେହି କାଦୁଅ ରାସ୍ତାରେ ଗଲେ କାଳେ ଗୋଡ ଖସି ପୋଖରୀରେ ପଡିବେ ବୋଲି ଭୟଭୀତ ବାପା ମା’ ।
ଏନେଇ ଗ୍ରାମବାସୀମାନେ ଲୋକ ପ୍ରତିନିଧିଙ୍କଠାରୁ ଆରମ୍ଭ କରି ପ୍ରଶାସନ ପର୍ଯ୍ୟନ୍ତ ଜଣାଇଥିଲେ ମଧ୍ୟ ମିଳି ନାହିଁ କୌଣସି ସୁଫଳ । ତେବେ ଗାଁର ରାସ୍ତା ସମସ୍ୟାକୁ ନେଇ ଜିଲ୍ଲା ପ୍ରକଳ୍ପ ନିର୍ଦ୍ଦେଶକଙ୍କୁ ପଚାରିବାରୁ ଯଥାଶୀଘ୍ର ବିଡିଓଙ୍କୁ ରାସ୍ତା ନିର୍ମାଣ ପାଇଁ ନିର୍ଦ୍ଦେଶ ଦେଇଥିବା ପ୍ରକାଶ କରିଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
