କେନ୍ଦୁଝର: ତେଲକୋଇ ବନାଞ୍ଚଳରେ ବଢିବାରେ ଲାଗିଛି ବଣୁଆ ହାତୀ ଉପଦ୍ରବ । ଏହି ବନାଞ୍ଚଳରେ 40 ଟି ହାତୀ ରହୁଥିବାବେଳେ ଗାଁ ଲୋକଙ୍କ ନିଦ ହଜାଇ ଦେଲେଣି । ବିମଳା ଫରେଷ୍ଟ ସେକସନ୍ ଅଧିନ ଭୀମକାଣ୍ଡ ପଞ୍ଚାୟତ ଅନ୍ତର୍ଗତ ଗୋଳାଗାଡିଆ ଗ୍ରାମରେ ଗତକାଲି(ଶୁକ୍ରବାର) ବିଳମ୍ବିତ ରାତିରେ ପୁଣି ୧୫ ଟିକିଆ ହାତୀ ପଲ ଉପଦ୍ରବ ସୃଷ୍ଟି କରିଛନ୍ତି ।
ରାତି ପ୍ରାୟ ୧ଟା ବେଳେ ଗୋଳାଗାଡିଆ ନୂଆସାହିରେ ହାତୀ ପଲ ପଶି ସେହି ଅଞ୍ଚଳର ଜୟନ୍ତୀ ମୁଣ୍ଡାଙ୍କ ୨ ବଖରା ଘର ଭାଙ୍ଗି ଧାନ ଚାଉଳ ଖାଇ ଯାଇଛନ୍ତି । ତେବେ ସୌଭାଗ୍ୟକୁ ପରିବାରର କାହାରି କିଛି କ୍ଷତି ହୋଇନାହିଁ । ଗାଁ ଲୋକେ ମିଶି ବହୁ କଷ୍ଟରେ ହାତୀ ପଲକୁ ଘଉଡାଇଥିଲେ । ବନ ବିଭାଗ ପକ୍ଷରୁ ହାତୀ ଘଉଡ଼ାଇବାକୁ ଉଦ୍ୟମ କରାଯାଇଥିଲେ ମଧ୍ୟ ସେମାନେ ବିଫଳ ହେଉଛନ୍ତି । ଏନେଇ କ୍ଷତିଗ୍ରସ୍ତ ପରିବାରକୁ ତୁରନ୍ତ କ୍ଷତିପୂରଣ ପ୍ରଦାନ କରିବାକୁ ଭୀମକାଣ୍ଡ ସରପଞ୍ଚ ନିରଞ୍ଜନ ନାୟକ ଦାବି କରିଛନ୍ତି ।
ଏଠାରେ ସୂଚନାଯୋଗ୍ୟ, ଗତ ୨ଦିନ ତଳେ ସେହି ଗ୍ରାମର ବିଷ୍ଣୁ ମହାକୁଡଙ୍କ ୩ ବଖରା ଘର ଭାଙ୍ଗି ଧାନ ଚାଉଳ ଖାଇ ଯାଇଥିବା ବେଳେ ଗତକାଲି ପୁଣି ଉତ୍ପାତ କରିଛନ୍ତି । ତେବେ ତେଲକୋଇ ଅଞ୍ଚଳରେ ଦିନକୁ ଦିନ ହାତୀ ଉପଦ୍ରବ ବୃଦ୍ଧି ପାଉଥିବାରୁ ସାଧାରଣରେ ଅସନ୍ତୋଷ ଦେଖା ଦେଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
