କେନ୍ଦ୍ରାପଡ଼ା: ଏସସି ଓ ଏସଟି କୃରତା ନିରୋଧୀ ଆଇନ ୩(୧)(x)ରେ ରାଜ୍ୟରେ ପ୍ରଥମ ଦଣ୍ଡ ଶୁଣାଇଲେ ଜିଲ୍ଲା ଦୌରାଜଜ୍ । ଦଳିତଙ୍କୁ ଆକ୍ରମଣ ଘଟଣାରେ ଅଭିଯୁକ୍ତ ବାପା ଓ ତିନି ପୁଅ ଦୋଷୀ ସାବ୍ୟସ୍ତ କରିଛନ୍ତି ଅଦାଲତ । ଗତ ୨୩ ମାର୍ଚ୍ଚ ୨୦୧୫ ମସିହାରେ କେନ୍ଦ୍ରାପଡ଼ା ଜିଲ୍ଲା ମାର୍ଶାଘାଇ ଥାନା ଦୁମୁକା ଗାଁର ଜଣେ ବ୍ୟକ୍ତିଙ୍କ ଜାତିକୁ ଆକ୍ଷେପ କରି ଆକ୍ରମଣ କରିଥିବା ମାମଲାର ଶୁଣାଣି କରି ଦଣ୍ଡାଦେଶ ଦେଇଛନ୍ତି କୋର୍ଟ ।
ଅଭିଯୋଗ ଅନୁଯାୟୀ, ଗତ ୨୩ ମାର୍ଚ୍ଚ ୨୦୧୫ ମସିହା ପୂର୍ବାହ୍ନ ୧୦ ଘଟିକାରେ ଅଭିଯୋଗକାରୀ ମାର୍ଶାଘାଇ ଥାନା ଦୁମୁକା ଗାଁର ଗଗନ ମଲ୍ଲିକ ଭାଗଚାଷ କରୁଥିବା ଗୁଣମଣି ଦାସଙ୍କ ବିଲରୁ ମୁଗ ଭାର ନେଇ ଆସୁଥିଲେ । ଏହି ସମୟରେ କାନପୁର ରାସ୍ତାରେ ଗାଁର ବିପିନ ବିହାରୀ ଦାସ ଓ ତାଙ୍କ ତିନିପୁଅ ସେଠାରେ ପହଞ୍ଚି ଗଗନଙ୍କୁ ଅଟକାଇ ଜାତିଆଣ ଆକ୍ଷେପ କରିବା ସହ ଅଶ୍ଳୀଳ ଭାଷାରେ ଗାଳିଗୁଲଜ କରି ମାଡ଼ ମାରିଥିଲେ । ଏହି ସମୟରେ ଗଗନଙ୍କ ପୁତୁରା ରଞ୍ଜନ ପହଞ୍ଚି ପ୍ରତିବାଦ କରିବାରୁ ତାଙ୍କୁ ମଧ୍ୟ ମାଡ଼ ମାରି ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ । ସ୍ଥାନୀୟ ଲୋକେ ପାଟି ଶୁଣି ଆସିବାରୁ ସେମାନେ ଫେରାର ହୋଇ ଯାଇଥିଲେ ।
ଏହା ମଧ୍ୟ ପଢ଼ନ୍ତୁ: cyclone sitrang: ଜିଲ୍ଲା ପ୍ରଶାସନର ପ୍ରସ୍ତୁତି, ଭୟଭୀତ ନହେବାକୁ ଜିଲ୍ଲା ପ୍ରଶାସନର ପରାମର୍ଶ
ଏନେଇ ପରଦିନ ମାର୍ଶାଘାଇ ଥାନାରେ ଗଗନ ଅଭିଯୋଗ କରିବା ପରେ ପୋଲିସ ଘଟଣାର ତଦନ୍ତ କରି ବିପିନ ବିହାରୀ ଦାସ ଓ ତାଙ୍କ ତିନିପୁଅ ଉଦୟଶେଖର ଦାସ, ଉଲ୍ଲାସ ଚନ୍ଦ୍ର ଦାସ ଓ ଉଜ୍ଜ୍ୱଳକାନ୍ତ ଦାସଙ୍କୁ ଗିରଫ କରି କୋର୍ଟ ଚାଲଣ କରିଥିଲା । ପରବର୍ତ୍ତୀ ସମୟରେ ପୋଲିସ ଅଭିଯୁକ୍ତମାନଙ୍କ ବିରୋଧରେ କୋର୍ଟରେ ଚାର୍ଜସିଟ ଦାଖଲ କରିଥିଲେ ।
ଏସସି,ଏସଟି ସ୍ପେଶାଲ କୋର୍ଟରେ ଏହାର ଶୁଣାଣି ଚାଲିଥିବା ବେଳେ ମୋଟ ୧୨ ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇ ଅଭିଯୁକ୍ତ ବାପ ପୁଅଙ୍କୁ ବିଚାରପତି ବିଶ୍ବଜିତ ମହାନ୍ତି ଦଫା ୩୪୧ରେ ୧୫ ଦିନ, ଦଫା ୩୨୩ରେ ୩ ମାସ, ଦଫା ୩୨୪ରେ ୬ମାସ ଓ ରାଜ୍ୟରେ ପ୍ରଥମ ଏସସି,ଏସଟି କୃରତା ନିରୋଧୀ ଆଇନ ଦଫା ୩(୧)(x)ରେ ଏକବର୍ଷ ସଶ୍ରମ କାରାଦଣ୍ଡ ରାୟ ଶୁଣାଇଛନ୍ତି । ରାଜ୍ୟରେ ପ୍ରଥମଥର ପାଇଁ ଏସସି,ଏସଟି କୃଏଲିଟି ଆକ୍ଟରେ ଦଣ୍ଡ ଶୁଣାଯାଇଥିବା ନେଇ ସୂଚନା ଦେଇଛନ୍ତି କେନ୍ଦ୍ରାପଡ଼ା ଏସସି ଏସଟି ସ୍ପେଶାଲ କୋର୍ଟର ଏପିପି ଗୋକୁଳ ରଞ୍ଜନ ଦାଶ। କୋର୍ଟଙ୍କ ଏହି ଐତିହାସିକ ରାୟକୁ ବିଭିନ୍ନ ମହଲରୁ ସ୍ବାଗତ କରାଯାଇଛି ।
ଇଟିଭି ଭାରତ, କେନ୍ଦ୍ରାପଡ଼ା
