କେନ୍ଦୁଝର: ଏକମାତ୍ର ରାଷ୍ଟ୍ରବାଦୀ ସଙ୍ଗଠନ ଭାରତୀୟ ମଜଦୂର ସଂଘର ପ୍ରତିଷ୍ଠାତା ସ୍ବର୍ଗତଃ ଦତ୍ତପନ୍ଥ ଠେଙ୍ଗଡିଙ୍କ ଜନ୍ମ ଶତବାର୍ଷିକୀ ପାଳିତ ହୋଇଯାଇଛି । ଏଥିପାଇଁ ରବିବାର ଆୟୋଜିତ କାର୍ଯ୍ୟକ୍ରମରେ ସ୍ଥାନୀୟ କାଳି ପଡିଆରୁ ଶତାଧିକ ଅଙ୍ଗନବାଡି କର୍ମୀ ଓ ଅନ୍ୟାନ୍ୟ ମଜଦୂର ୟୁନିୟନର କର୍ମୀମାନେ ଏକ ବିରାଟ ଶୋଭାଯାତ୍ରାର ଆୟୋଜନ କରିଥିଲେ ।
ବିଶାଳ ଶୋଭାଯାତ୍ରାରେ ସଙ୍ଗଠନର କର୍ମୀମାନେ ନଗର ପରିକ୍ରମା କରିଥିଲେ । ବାଦ୍ୟର ତାଳେ ତାଳେ ନାଚି ନାଚି ନଗର ପରିକ୍ରମା ପରେ ସ୍ଥାନୀୟ ସରସ୍ବତୀ ଶିଶୁ ବିଦ୍ୟା ମନ୍ଦିରଠାରେ ଏକ ସାଧାରଣ ସଭା ଅନୁଷ୍ଠିତ ହୋଇଥିଲା । ସାଧାରଣ ସଭାରେ ରାଜ୍ୟ ସଙ୍ଗଠନ ସମ୍ପାଦକ ମୁଖ୍ୟ ବକ୍ତା ଭାବେ ଯୋଗ ଦେଇ ଦତ୍ତପନ୍ଥ ଠେଙ୍ଗଡିଙ୍କ ଜୀବନ ଆଦର୍ଶ ଉପରେ ବକ୍ତବ୍ୟ ଦେଇଥିଲେ ।
ସେପଟେ ଅନେକ ବରିଷ୍ଠ ପଦାଧିକାରୀମାନେ କାର୍ଯ୍ୟକ୍ରମରେ ଯୋଗ ଦେଇ ଶ୍ରମିକଙ୍କ ସ୍ବାର୍ଥ ପାଇଁ ଆଜୀବନ କାମ କରିଥିବା ଠେଙ୍ଗଡିଙ୍କ ଆଦର୍ଶକୁ ଲୋକଙ୍କ ପାଖରେ ପହଞ୍ଚାଇବା ପାଇଁ ଆହ୍ବାନ ଦେଇଥିଲେ । ଏନେଇ ଆସନ୍ତା ନଭେମ୍ବର 10, 2020 ମସିହା ପର୍ଯ୍ୟନ୍ତ ମଜଦୂର ସଙ୍ଘ ପକ୍ଷରୁ ବିଭିନ୍ନ କାର୍ଯ୍ୟକ୍ରମମାନ ଚାଲୁ ରହିବ ବୋଲି ଜଣା ପଡିଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
