କେନ୍ଦୁଝର: ଶୀଥଳ ହୋଇପଡିଛି ଶୀତଳ ଭଣ୍ଡାର ଭଣ୍ଡାର । ଚାଷୀଙ୍କ ଅଭାବୀ ବିକ୍ରୀ ସମସ୍ୟା ଓ ଦର ନିୟନ୍ତ୍ରଣ ପାଇଁ ରାଜ୍ୟ ସରକାର ଶୀତଳ ଭଣ୍ଡାର ପ୍ରତିଷ୍ଠା କରିଥିବାର କହୁଛନ୍ତି । ହେଲେ ସରକାର ଶୀତଳ ଭଣ୍ଡାର ପାଇଁ କେତେ ପାରଙ୍ଗମ ତାହା ଦେଖିବାକୁ ମିଳିଛି କେନ୍ଦୁଝରର ଏକ ଆଦିବାସୀ ଅଧ୍ୟୁଷିତ ବାଂଶପାଲ ବ୍ଲକରେ । ଭଣ୍ଡାର ନିର୍ମାଣ ହେବାର 8 ବର୍ଷ ପରେ ମଧ୍ୟ ଏଠାକାର ଚାଷୀଙ୍କୁ ମିଳିପାରିଲା ନାହିଁ କୌଣସି ସୁବିଧା ।
ଭଣ୍ଡାର ଘରର ନା ରକ୍ଷଣାବେକ୍ଷଣା କରାଗଲା ନା ଚାଷୀଙ୍କୁ ପନିପରିବା ରଖିବାର ସୁବିଧା ଦିଆଗଲା । ଏମିତି 8 ବର୍ଷ ଧରି ଭଣ୍ଡାରରେ ଝୁଲୁ ରହିଛି ତାଲା । ଏପରିକି ଭଣ୍ଡାର ଘର ଭାଙ୍ଗିରୁଜି ଯିବାସହ ବିଦ୍ୟୁତ ଟ୍ରାନ୍ସଫର୍ମର ଚୋରି ହୋଇଥିବାର ଅଭିଯୋଗ ହୋଇଛି । ଖାଲି ସେତିକି ନୁହେଁ, ଭଣ୍ଡାର ଘରର ଜଗୁଆଳି ଦାୟିତ୍ବରେ ଥିବା ବ୍ୟକ୍ତିଙ୍କୁ ମଧ୍ୟ ଆଜି ଯାଏଁ ଟଙ୍କାଟିଏ ମିଳିପାରିଲା ନାହିଁ ।
2013-14 ଆର୍ଥିକ ବର୍ଷରେ ଆଦିବାସୀ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ବ୍ଲକରେ 6ଟି ଶୀତଳ ଭଣ୍ଡାର ନିର୍ମାଣ କରାଯାଇଥିଲା । ଏହି 6ଟି ମଧ୍ୟରେ ବାଂଶପାଳ ବ୍ଲକର ରାଇଗୁଡା ଓ କମଙ୍ଗାରେ ଥିବା ଭଣ୍ଡାରଟି ଏବେ ଖତ ଖାଉଛି । କାରଣ ଯେଉଁ ଉଦ୍ଦେଶ୍ୟ ନେଇ ଏହାର ନିର୍ମାଣ ହୋଇଥିଲା ତାହା ସାଧିତ ହୋଇପାରିଲାନାହିଁ । ଯାହାକୁ ନେଇ ଚାଷୀଙ୍କ ମହଲରେ ଅସନ୍ତୋଷ ବଢିବାରେ ଲାଗିଛି ।
ସେପଟେ, ଘଟଣାର ତଦନ୍ତ କରାଯିବା ପରେ ହିଁ କାର୍ଯ୍ୟାନୁଷ୍ଠାନ ନେବେ ବୋଲି ଜିଲ୍ଲାପାଳ କହିଛନ୍ତି । କିନ୍ତୁ ଏଠି ପ୍ରଶ୍ନ ଉଠୁଛି ଲୋକଙ୍କ ଅର୍ଥରେ ନିର୍ମିତ ହୋଇଥିବା ଶୀତଳ ଭଣ୍ଡାରକୁ କାହିଁକି ରାଜ୍ୟ ସରକାର ଜାଣିଶୁଣି ପରିଚାଳନା କଲେ ନାହିଁ । ଆଉ ଏତେ କୋଟିକୋଟି ଟଙ୍କା ଖର୍ଚ୍ଚ କରାଯିବାର ତାତ୍ପର୍ଯ୍ୟ କଣ । ଏଇଠୁ ସ୍ପଷ୍ଟ ଚାଷ ଓ ଚାଷୀଙ୍କ ପ୍ରତି କେତେ ସମ୍ବେଦନଶୀଳ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
