କେନ୍ଦୁଝର: ସହରରେ ଦିନକୁ ଦିନ ପ୍ରଦୂଷଣର ମାତ୍ରା ବଢି ଚାଲିଛି । ଏଥିସହିତ ତାପମାତ୍ରା ମଧ୍ୟ ବୃଦ୍ଧି ପାଉଛି । ଫଳରେ ପରିବେଶ ନିଜ ସନ୍ତୁଳନ ହରାଉଛି । ପରିବେଶର ଏହି ଅସନ୍ତୁଳିତ ଅବସ୍ଥାକୁ ଦେଖି ମନୁଷ୍ୟ ଆସ୍ତେ ଆସ୍ତେ ଏହାର ସଚେତନ ହେବା ସହ ସରକାର ମଧ୍ୟ ଏଥିପାଇଁ ଯତ୍ନବାନ ହୋଇଛନ୍ତି । ଆଉ ଏହି ସଚେତନତା କାର୍ଯ୍ୟକ୍ରମରେ ଆଗଧାଡିରେ ରହିଛନ୍ତି କେନ୍ଦୁଝରର ରମେଶ ସାର ।
ଦୀର୍ଘ ସମୟ ଧରି ସେ 'ବୃକ୍ଷ ଗଙ୍ଗା' ନାମକ ଏକ ଅଭିଯାନ ଆରମ୍ଭ କରିଛନ୍ତି । ଏହି ଅଭିଯାନ ମାଧ୍ୟମରେ ସେ ଗାଁ ଗଣ୍ଡାରେ ନୂତନ ଗଛର ସମ୍ଭାର କରି ଚାଲିଛନ୍ତି । ପ୍ରତିବର୍ଷ ରମେଶ ନିଜସ୍ୱ ଦରମା ଟଙ୍କାରେ ବିଭିନ୍ନ ପ୍ରକାରର ଚାରା ଉତ୍ପାଦନ କରିଥାନ୍ତି । ଏହି ଚାରା କିପରି ଠିକ ଭାବେ ରୋପଣ ହେବ ଏବଂ ବୃଦ୍ଧି ପାଇବ ସେଥିପ୍ରତି ମଧ୍ୟ ସେ ଯତ୍ନବାନ ହୋଇଥାନ୍ତି ।
ତେବେ ରମେଶ ବୃକ୍ଷରୋପଣର ଏହି ସଚେତନ ବାର୍ତ୍ତା ସ୍କୁଲ ଛାତ୍ରଛାତ୍ରୀଙ୍କ ମଧ୍ୟରେ ସୃଷ୍ଟି କରିଛନ୍ତି । ଏଥିପାଇଁ ସେ ବିଭିନ୍ନ କାର୍ଯ୍ୟର ଆୟୋଜନ କରିଥାନ୍ତି । ଚଳିତ ବର୍ଷ ବୃକ୍ଷ ଗଙ୍ଗା ଅଭିଯାନ ମାଧ୍ୟମରେ ଜଙ୍ଘିରା ଠାରେ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମରେ ପଦ୍ମଶ୍ରୀ ଦୈତାରୀ ନାଏକଙ୍କୁ ସମ୍ବର୍ଦ୍ଧିତ କରିବା ସହ ସାମୁହିକ ଵୃକ୍ଷରୋପଣ କରଯାଇଥିଲା । କାର୍ଯ୍ୟକ୍ରମରେ ଉକ୍ତ ଅଞ୍ଚଳର ଶତାଧିକ ଛାତ୍ରଛାତ୍ରୀଙ୍କୁ ବିଭିନ୍ନ ପ୍ରକାର ଚାରା ବଣ୍ଟନ କରାଯାଇଥିଲା । ଛାତ୍ରଛାତ୍ରୀମାନେ ଏହି ଚାରାକୁ ରୋପଣ କରିବା ସହ ଏହା ବଢିବା ପର୍ଯ୍ୟନ୍ତ ଯତ୍ନବାନ ହେବେ ବୋଲି ପ୍ରତିଜ୍ଞା ନେଇଥିଲେ ।
ସେପଟେ କାର୍ଯ୍ୟକ୍ରମରେ ଉପସ୍ଥିତ ପଦ୍ମଶ୍ରୀ ଦୈତାରୀ ନାଏକ ବୃକ୍ଷ ଏକ ଅମୂଲ୍ୟ ସମ୍ପଦ, ଏହାକୁ ବଞ୍ଚାଇବାକୁ ଉଦ୍ୟମ କରିବାକୁ ଆହ୍ୱାନ ଦେଇଥିଲେ । କାର୍ଯ୍ୟକ୍ରମରେ ଜଙ୍ଗଲ ବିଭାଗର ଅଧିକାରୀଙ୍କ ସହ ବିଭିନ୍ନ ବର୍ଗର ଲୋକେ ସାମିଲ ହୋଇଥିଲେ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
