କଟକ: ଅଦରକାରୀ ଜରି ବା ପଲିଥିନରୁ ତିଆରି ହେଉଛି ବିଭିନ୍ନ ଦରକାରୀ ସାମଗ୍ରୀ । ଅଟା ପ୍ୟାକେଟ, ବିଭିନ୍ନ ଚିପ୍ସ ପ୍ୟାକେଟ, ସର୍ପ ଜରି, ଲୁଣ ଜରି ଓ ତେଲ ଜରି ଆଦିକୁ ବ୍ୟବହାର କରି ବିଭିନ୍ନ ସାମଗ୍ରୀ ପ୍ରସ୍ତୁତ କରି ଚର୍ଚ୍ଚାରେ ରହିଆସିଛନ୍ତି କେନ୍ଦ୍ରାପଡ଼ାର କମଳା ମହାରଣା । ଏପରିକି ପ୍ରଧାନମନ୍ତ୍ରୀଙ୍କ ‘ମନ କି ବାତ' କାର୍ଯ୍ୟକ୍ରମରେ ମଧ୍ୟ ସେ ପ୍ରଶଂସିତ ହୋଇଛନ୍ତି । ତେବେ ବାଲିଯାତ୍ରାରେ କମଳା ନିଜର ଷ୍ଟଲ ଖୋଲି ବିଭିନ୍ନ ସାମଗ୍ରୀ ବିକ୍ରି କରୁଛନ୍ତି ।
୫୦ଟଙ୍କାରୁ ଆରମ୍ଭ କରି ୧୦୦୦ ଟଙ୍କା ପର୍ଯ୍ୟନ୍ତ:
କମଳା ମହାରଣାଙ୍କ ଷ୍ଟଲରେ ଥିବା ସାମଗ୍ରୀ ଗୁଡିକର ମୂଲ୍ୟ ୫୦ ଟଙ୍କାରୁ ଆରମ୍ଭ କରି ୧୦୦୦ ଟଙ୍କା ପର୍ଯ୍ୟନ୍ତ ରହିଛି । ଏହାର ଭଲ ଚାହିଦା ମଧ୍ୟ ରହିଛି । କମଳାଙ୍କ ଷ୍ଟଲ ଆଗରେ ଦର୍ଶକଙ୍କ ଭିଡ଼ ବି ଜମୁଛି । ପ୍ରାୟ ୮ ରୁ ୧୦ ପ୍ରକାର ଆଇଟମ ସେ ବାଲିଯାତ୍ରାକୁ ଆଣିଛନ୍ତି । ପେଡ଼ି, ପାଚିଆ, ଡାଲା, ବିଛଣା, ବଡ଼ି ଓ ପାମ୍ପଡ଼ ଶୁଖାଇବା ପାଇଁ ଝାମ୍ପି, ମନିପର୍ସ, ପାପୋଛ ଏବଂ ବିଭିନ୍ନ ଘର ସଜା ସାମଗ୍ରୀ ରହିଛି। ଏହି ସାମଗ୍ରୀଗୁଡିକୁ ପ୍ରଥମ ଥର ଲାଗି ବାଲିଯାତ୍ରାକୁ ଆଣିଛନ୍ତି କମଳା ମହାରଣା । ତଳ ପଡିଆର ଓରମାସରେ ରହିଛି କମଳା ମହାରଣାଙ୍କ ଷ୍ଟଲ ।
ଏହା ବି ପଢନ୍ତୁ....କମଳା ମାଉସୀଙ୍କ ହାତ ତିଆରି ରାକ୍ଷୀ ପିନ୍ଧିବେ ପ୍ରଧାନମନ୍ତ୍ରୀ ମୋଦି - Kamala send Rakhi to Modi
ଏହା ବି ପଢନ୍ତୁ....ଆରମ୍ଭ ହେଲା ଐତିହାସିକ କଟକ ବାଲିଯାତ୍ରା, ଉଦ୍ଘାଟନ କଲେ ମୁଖ୍ୟମନ୍ତ୍ରୀ ମୋହନ ମାଝୀ
କମଳା ମହାରଣା କିଏ?
କେନ୍ଦ୍ରାପଡ଼ା ଗୁଲନଗର ଖଇରାବାଦର ବସିନ୍ଦା କମଳା ମହାରଣା । ବୟସ ୬୦ବର୍ଷରୁ ଊର୍ଦ୍ଧ୍ବ ହେବ । କମଳାଙ୍କ କହିବା ମୁତାବକ, ସେ ତାଙ୍କର ଦୁଇଟି ଗାଈକୁ ବିକିବା ପରେ ବିଭିନ୍ନ ପ୍ରକାର ଅଦରକାରୀ ଜରିରୁ କିଛି କିଛି ପ୍ରସ୍ତୁତ କରିବା ଆରମ୍ଭ କରିଥିଲେ । ବାହାରେ କିମ୍ବା ଅଳିଆ ଗଦାରେ ପଡିଥିବା ଜରି ଆଣି ସେସବୁକୁ ଭଲରେ ଧୋଇ ଘରକରଣା ସାମଗ୍ରୀ ତିଆରି କରିଲେ । ପରେ ତାଙ୍କ ଯା'ଙ୍କୁ ମଧ୍ୟ ଏହି କାର୍ଯ୍ୟରେ ଲଗାଇଦେଲେ । ଉଭୟ ମିଶି ଅନେକ ଆକର୍ଷଣୀୟ ସାମଗ୍ରୀ ପ୍ରସ୍ତୁତ କରିଲେ । ଯାହାକୁ ପ୍ରଧାନମନ୍ତ୍ରୀ ମୋଦି ପ୍ରଶଂସା କରିଥିଲେ । ଏହି ସାମଗ୍ରୀ ପ୍ରସ୍ତୁତ କରିବା ପାଇଁ ତାଙ୍କ ବନ୍ଧୁବାନ୍ଧବ ମଧ୍ୟ ଅଦରକାରୀ ଜରି ଦେଉଥିଲେ । ଏହାପରେ ନିଜ ଗ୍ରାମର ପ୍ରାୟ ୨୩ ଜଣ ମହିଳାଙ୍କୁ ନେଇ କମଳା ଏକ ଗ୍ରୁପ ବି ପ୍ରସ୍ତୁତ କରିଥିଲେ । ବଡ଼କଥା ହେଉଛି କି ଏହି ସାମଗ୍ରୀକୁ ଚଳିତବର୍ଷ ବାଲିଯାତ୍ରାରେ ବିକ୍ରୟ ପାଇଁ ତାଙ୍କୁ ଓରମାସ ପକ୍ଷରୁ ଷ୍ଟଲ ଯୋଗାଇ ଦିଆଯାଇଛି ।
ଇଟିଭି ଭାରତ, କଟକ
