କେନ୍ଦୁଝର: ବହୁଜନ କ୍ରାନ୍ତି ମୋର୍ଚ୍ଚା ପକ୍ଷରୁ ସିଏଏକୁ ବିରୋଧ କରି ବୁଧବାର କେନ୍ଦୁଝର ସହର ସ୍ଥିତ ଗାନ୍ଧୀ ଛକଠାରେ ରାସ୍ତା ଅବରୋଧ କରାଯାଇଥିଲା । ଆନ୍ଦୋଳନକାରୀଙ୍କ ସଂଖ୍ୟା ବଢିବା ପରେ ସିଏଏକୁ ବିରୋଧ କରିବାକୁ ଯାଇ ସେମାନେ ଦେଶ ବିରୋଧୀ ନାରା ଦେଇଥିଲେ । ଯାହାକୁ ନିକଟରେ ଉପସ୍ଥିତ ଥିବା ସ୍ଥାନୀୟ ଲୋକ ବିରୋଧ କରିବାରୁ ଆନ୍ଦୋଳନକାରୀମାନେ ସହରବାସୀଙ୍କୁ ଆକ୍ରମଣ କରିବାକୁ ଚେଷ୍ଟା କରିଥିଲେ ।
ଖବର ପାଇ ସହରବାସୀ ଏକାଠି ହୋଇ ଭାରତ ବନ୍ଦ ଡାକରାକୁ ବିରୋଧ କରିବା ସହ ଭାରତ ମାତା କି ଜୟ ନାରା ଦେଇଥିଲେ । ଫଳରେ ଚପା ଉତ୍ତେଜନା ସୃଷ୍ଟି ହୋଇଥିଲା ।
ସହରବାସୀମାନେ ଦେଶ ବିରୋଧୀ ସ୍ଲୋଗାନ ଦେଇଥିବା ଦୁଇ ଜଣଙ୍କୁ ପୋଲିସକୁ ଜିମା ଦେଇଥିଲେ । ଉତ୍ତେଜନାକୁ ଦେଖି ପୋଲିସ ମଧ୍ୟ ୩୦ରୁ ଊର୍ଦ୍ଧ୍ବ ଆନ୍ଦୋଳନକାରୀଙ୍କୁ ଅଟକ ରଖିଛି ।
ଏପଟେ ଦେଶ ବିରୋଧୀ ନାରାକୁ ଜିଲ୍ଲା ଓକିଲ ସଂଘ ମଧ୍ୟ କଡା ବିରୋଧ କରିଛି । ଭାରତ ବିରୋଧୀ ସ୍ଲୋଗାନକାରୀଙ୍କୁ ତୁରନ୍ତ ଗିରଫ କରିବା ସହ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛି ଓକିଲ ସଂଘ । ଏନେଇ ଟାଉନ ଥାନାରେ ମଧ୍ୟ ଓକିଲ ସଂଘ ପକ୍ଷରୁ ଏକ ଲିଖିତ ଅଭିଯୋଗ କରାଯାଇଛି । ଏଥିସହ ଉକ୍ତ ଦୋଷୀଙ୍କ ବିରୁଦ୍ଧରେ ଓକିଲାତିନାମା କେହି ନଭରିବାକୁ ସଙ୍ଘ ପ୍ରସ୍ତାବ ଆଗତ କରିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
