କେନ୍ଦୁଝର: ରାଜ୍ୟରେ କୋରୋନା ସଂକ୍ରମଣରେ ବୃଦ୍ଧି ଘଟିଥିବା ବେଳେ ଜିଲ୍ଲାରେ ମଧ୍ୟ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି । ଏହାକୁ ନଜରରେ ରଖି ଜିଲ୍ଲା ପ୍ରଶାସନ ଦୃଢ ପଦକ୍ଷେପ ଗ୍ରହଣ କରିଥିବା ବେଳେ ଲୋକଙ୍କୁ ସଚେତନ କରାଇବା ପାଇଁ ଆଗେଇ ଆସିଛନ୍ତି ଯୁବଗୋଷ୍ଠୀ । ତେବେ ସେମାନେ ଜିଲ୍ଲାବାସୀଙ୍କୁ ମାସ୍କ ପରିଧାନ ପାଇଁ ସଚେତନ କରାଇଛନ୍ତି ।
ଜିଲ୍ଲାକୁ ଦେଖାଦେଇଛି କୋରୋନାର ଦ୍ବିତୀୟ ଲହରୀ । ଏହି କୋରୋନାକୁ ନେଇ ଜିଲ୍ଲା ପ୍ରଶାସନ ପକ୍ଷରୁ ସଚେତନତା ସହ କଡା ପଦକ୍ଷେପ ଗ୍ରହଣ କରାଯାଉଛି । ଲୋକମାନଙ୍କୁ ମାସ୍କ ପରିଧାନ ପାଇଁ ପ୍ରଶାସନ ପକ୍ଷରୁ ଜୋର ଦିଆଯାଉଛି । ତଥାପି କିଛି ଅମାନିଆ ଏହି ନିୟମକୁ ମାନୁ ନାହାନ୍ତି । ଏଥିଲାଗି ଲୋକମାନଙ୍କୁ ସଚେତନ କରାଇବା ପାଇଁ ଆଗେଇ ଆସିଛ୍ତି ଯୁବଗୋଷ୍ଠୀ । ସହରରେ ମାସ୍କ ପରିଧାନ ପାଇଁ ସେମାନେ ଲୋକମାନଙ୍କୁ ସଚେତନତା ବାର୍ତ୍ତା ଦେଇଛନ୍ତି । ଇଣ୍ଡିଆନ ବାଇ ବାର୍ଥ ନାମକ ସ୍ୱେଚ୍ଛାସେବୀ ସଂଗଠନର ସ୍ୱେଚ୍ଛାସେବୀମାନେ ସ୍ଥାନୀୟ ଲାବଣ୍ୟ ଛକ ନିକଟରେ ମାଗଣା ମାସ୍କ ବଣ୍ଟନ କରିଥିଲେ ।
ଯେଉଁ ଯାତ୍ରୀମାନେ ମାସ୍କ ପରିଧାନ କରିନଥିଲେ ତାଙ୍କୁ ସ୍ୱେଚ୍ଛାସେବୀମାନେ ମାସ୍କ ପିନ୍ଧାଇଥିବା ଦେଖିବାକୁ ମିଳିଥିଲା । ରବିବାର ସହରରେ ସଂଗଠନ ପକ୍ଷରୁ ଦୁଇ ହଜାରରୁ ଊର୍ଦ୍ଧ୍ବ ମାସ୍କ ବଣ୍ଟନ କରାଯାଇଥିଲା । ଆଗାମୀ ଦିନରେ ଏଭଳି ମାସ୍କ ବଣ୍ଟନ କାର୍ଯ୍ୟକ୍ରମ ଜାରି ରହିବ ବୋଲି ସଂଗଠନ ପକ୍ଷରୁ କୁହାଯାଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
