କେନ୍ଦୁଝର: ଦିଲ୍ଲୀରେ ଚାଲିଥିବା ଚାଷୀ ଆନ୍ଦୋଳନକୁ ସମର୍ଥନ କରି ଜିଲ୍ଲାରେ ବିକ୍ଷୋଭ ପ୍ରଦର୍ଶନ କରାଯାଇଛି । AlKKMS ସଂଗଠନର ସଦସ୍ୟମାନେ ଗୁରୁବାର ଏକ ଶୋଭାଯାତ୍ରା କରି ଜିଲ୍ଲାପାଳଙ୍କ କାର୍ଯ୍ୟାଳୟରେ ବିକ୍ଷୋଭ ପ୍ରଦର୍ଶନ କରିଥିବା ସୂଚନା ମିଳିଛି ।
ଜିଲ୍ଲାରେ AlKKMS ସଂଗଠନର ପ୍ରାୟ ୫୦ ରୁ ଉର୍ଦ୍ଧ୍ବ ସଦସ୍ୟ କରଞ୍ଜିଆ ବସଷ୍ଟାଣ୍ଡରୁ ଏକ ଶୋଭାଯାତ୍ରାରେ ବାହାରି ସହର ପରିକ୍ରମା କରିବା ସହିତ ଜିଲ୍ଲାପାଳଙ୍କ କାର୍ଯ୍ୟଳୟ ସମ୍ମୁଖରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିଥିଲେ । କେନ୍ଦ୍ର ସରକାର ଆଣିଥିବା କୃଷକ ନିତୀକୁ ପ୍ରତ୍ୟାହାର କରିବା , ୧୯-୨୦ ଖରିଫ ଧାନ ଟଙ୍କା ପାଇ ନ ଥିବା ଚାଷୀଙ୍କୁ ତୁରନ୍ତ ଟଙ୍କା ପ୍ରଦାନ ଓ ମଣ୍ଡି ଗୁଡିକରେ ଚାଲିଥିବା ଦୁର୍ନୀତିକୁ ରୋକିବା ଆଦି ଦାବି କରିଥିଲେ ।
ସରକାର ଚାଷୀମାନଙ୍କ ଦାବିଗୁଡ଼ିକ ନ ମାନିଲେ ଆଗାମୀ ଦିନରେ ଏହି ଆନ୍ଦୋଳନକୁ ଜୋରଦାର କରାଯିବ ବୋଲି ଚେତାବନୀ ଦିଆଯାଇଛି । ଗୁରୁବାର କରାଯାଇଥିବା ବିକ୍ଷୋଭକୁ ଦେଖି ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା । ବିକ୍ଷୋଭ ଶେଷରେ ରାଷ୍ଟ୍ରପତିଙ୍କ ଉଦେଶ୍ୟରେ ଏକ ସ୍ମାରକ ପତ୍ର ଜିଲ୍ଲାପାଳଙ୍କୁ ସଂଗଠନର ସଦସ୍ୟମାନେ ପ୍ରଦାନ କରିଥିଲେ ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
