କେନ୍ଦୁଝର: ଏଠି ମାଳ ମାଳ ସରକାରୀ ଯୋଜନାର ଲାଭ ଉଠାଉଛନ୍ତି ବଡ ବଡ ଅଯୋଗ୍ୟ ହିତାଧିକାରୀ ବାବୁ । ହେଲେ ସରକାରୀ ସାହାଯ୍ୟ ଟିକକ ପାଇଁ ଆଶା ବାନ୍ଧି ବସିଥିବା ବେସାହାରା ଯୋଗ୍ୟ ହିତାଧିକାରୀ ଏବେ ବି ନିରାଶ । ଏମିତିରେ ପୁଣି ଦେଖିବାକୁ ମିଳିଛି ପାଇଖାନା ଘରେ ଗରିବୀର ଦୟନୀୟ ଚିତ୍ର । ଦୃଶ୍ୟଟି ହେଉଛି କେନ୍ଦୁଝର ସହର ନିକଟସ୍ଥ ଶିରିଶପାଳ ପଞ୍ଚାୟତର ରାଙ୍କି ଗ୍ରାମର । ଯେଉଁଠି ସରକାରୀ ସ୍ବଚ୍ଛ ଭାରତ ମିଶନରୁ ମିଳିଥିବା ଶୌଚାଳୟରେ ବିତୁଛି 4 କୁନି କୁନି ଛୁଆଙ୍କ ସହ ରଇବାରୀ ମୁଣ୍ଡାଙ୍କ ଦିନ । ସ୍ବାମୀଙ୍କ ମୃତ୍ୟୁ ପରେ ଶାଶୂ ଘର ପର କରିଥିଲେ ତାଙ୍କୁ । ଏମିତିରେ ସରକାରୀ ଯୋଜନାରେ ମିଳିଥିବା ଶୌଚାଳୟକୁ ଆଦରି ଜୀବନ କାଟୁଛନ୍ତି ରଇବାରୀ ।
ସ୍ବାମୀଙ୍କ ମୃତ୍ୟୁ ପରେ ଶାଶୂ ଘର ଲୋକଙ୍କୁ ସାହାରା ମାନିଥିଲେ ରଇବାରୀ । ହେଲେ ବିପଦ ସମୟରେ ସେମାନେ ବି ହାତ ଟେକି ପର କରିଥିଲେ ରଇବାରୀ ଓ ତାଙ୍କ 4 ଛୁଆଙ୍କୁ । ଶେଷରେ ଉପାୟଶୂନ୍ୟ ହୋଇ ସରକାରୀ ସ୍ବଚ୍ଛ ଭାରତ ଯୋଜନାରେ ମିଳିଥିବା ଶୌଚାଳୟକୁ ଆଦରି ନେଇଥିଲେ ଏହି 5 ପ୍ରାଣୀ କୁଟୁମ୍ବ । ଏହି ଶୌଚାଳୟରେ ଶୋଇବା, ଏଇଠି ରାନ୍ଧିବା ଓ ଏଇଠି ହିଁ ଖାଇବା । ବର୍ଷା ଦିନେ କିନ୍ତୁ ଅବସ୍ଥା ଦୁର୍ବିସହ ହେବାରୁ ପର ଦୁଆରେ ମୁଣ୍ଡ ଗୁଞ୍ଜନ୍ତି ରଇବାରୀ ଓ ପରିବାର ।
ଆଶ୍ଚର୍ଯ୍ୟର କଥା କି ଗରିବ ପରିବାରକୁ ଏଯାଏଁ ପ୍ରଧାନମନ୍ତ୍ରୀ ଆବାସ ଯୋଜନାଟିଏ ମିଳିନଥିବା ବେଳେ ପହଞ୍ଚିଛି କେବଳ ସ୍ବଚ୍ଛ ଭାରତ ମିଶନ ଅଧିନରେ ଏକ ଶୌଚାଳୟ । ଯାହା ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ବଣ୍ଟନର ତତ୍ପରତାକୁ ସ୍ପଷ୍ଟ କରେ । ଏମିତିରେ ସରପଞ୍ଚ ଓ ପଞ୍ଚାୟତ ନିର୍ବାହୀ ଅଧିକାରୀଙ୍କ ସହଯୋଗରେ ଅନେକ ଅଯୋଗ ହିତାଧିକାରୀ ସରକାରୀ ଆବାସ ଯୋଜନା ଘର ହାତେଇଥିବାର ସଙ୍ଗୀନ ଅଭିଯୋଗ ଆଣିଛନ୍ତି ନାଏବ ସରପଞ୍ଚ । ଏନେଇ ଜିଲ୍ଲା ପ୍ରକଳ୍ପ ଅଧିକାରୀଙ୍କୁ ଅବଗତ କରାଇବାରୁ ସେ ଏ ଦିଗରେ ଯଥାଶୀଘ୍ର ତଦନ୍ତ କରି ରଇବାରୀଙ୍କୁ ଘର ଯୋଗାଇବେ ବୋଲି ପ୍ରତିଶୃତି ଦେଇଛନ୍ତି ।
ରଇବାରୀଙ୍କ ପରି ଦୁଃଖୀ ରଙ୍କି ସରକାରୀ ସାହାଯ୍ୟକୁ ଚାତକ ପରି ଚାହିଁ ବସିଥିବା ବେଳେ ବଡ ବଡ ବାବୁ ଓ ସରକାରୀ ଅଧିକାରୀଙ୍କ ମଧୁଚନ୍ଦ୍ରିକା ଯୋଗୁଁ ସୁଯୋଗରୁ ହାତ ଧୋଇ ବସୁଛନ୍ତି ଯୋଗ୍ୟ ହିତାଧିକାରୀ । ଏମିତିରେ ରଇବାରୀଙ୍କୁ ଏପରି ଦୁଃଖରୁ ସରକାର ଶୀଘ୍ର ଉଦ୍ଧାର କରନ୍ତୁ, ତାହା ହିଁ ଅପେକ୍ଷା ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
