ଆନନ୍ଦପୁର: କେନ୍ଦୁଝର ଜିଲ୍ଲାରେ ଦିନକୁ ଦିନ ବଢୁଛି କୋରୋନା ମାମଲା । ବଢ଼ୁଥିବା ସଂକ୍ରମଣକୁ ଆଖି ଆଗରେ ରଖି ସମ୍ପୂର୍ଣ୍ଣ ଆନନ୍ଦପୁର ପୌରପରିଷଦ ସମେତ ପାଞ୍ଚୋଟି ଗାଁକୁ ଶୁକ୍ରବାର ଠାରୁ ୭ ଦିନ ପାଇଁ ସଟଡାଉନ ଘୋଷଣା କରିଛି ଜିଲ୍ଲା ପ୍ରଶାସନ । ଆନନ୍ଦପୁର ପୌରପରିଷଦରେ ମୋଟ ୨୧୬ ଟି ପଜିଟିଭ କେସ ବାହାରିଥିବା ବେଳେ ସଂକ୍ରମଣ ଦିନକୁ ଦିନ ବଢ଼ିବାରେ ଲାଗିଛି ।
ପ୍ରଥମେ ପୌରପରିଷଦକୁ ସଟଡାଉନ ଏବଂ ପରେ ପରେ ନିୟମରେ କିଛିଟା କୋହଳ କରି କଣ୍ଟେନମେଣ୍ଟ ଜୋନ ଘୋଷଣା କରିଥିବା ବେଳେ ପୁନର୍ବାର ଆଜିଠାରୁ ଅଗଷ୍ଟ ୨୭ ତାରିଖ ଯାଏଁ ସମ୍ପୂର୍ଣ୍ଣ ସଟଡାଉନ ଘୋଷଣା କରାଯାଇଛି । ଏହି ସମୟରେ ମେଡିସିନ ଦୋକାନକୁ ବାଦ ଦେଇ ଅନ୍ୟ ସମସ୍ତ ଦୋକାନ ବନ୍ଦ ରହିଥିବା ବେଳେ ସ୍ଥାନୀୟ ପ୍ରଶାସନ ଦ୍ୱାରା ଅତ୍ୟାବଶ୍ୟକ ସାମଗ୍ରୀ ଘରକୁ ଘର ବୁଲି ଯୋଗାଇବାର ବ୍ୟବସ୍ଥା କରାଯାଇଛି ।
ପୌରପରିଷଦ ନିକଟରେ ଥିବା ପାଞ୍ଚୋଟି ଗାଁ ଯଥା ବେଲବାହାଳି, ଜଳସୁଆଁ, ଟୋଲଙ୍ଗପଡା, ଶାଲବଣି ଏବଂ ମୋଚିନ୍ଦାରେ ଏହି ନିୟମ ଲାଗୁ ରହିବା ନେଇ ସୂଚନା ଦେଇଛନ୍ତି ଦାଇତ୍ୱରେ ଥିବା ଉପଜିଲ୍ଲାପାଳ । ଅନ୍ୟ ପକ୍ଷରେ ଲୋକମାନଙ୍କୁ ଆଗୁଆ ସୂଚନା ନଦେଇ ପ୍ରଶାସନର ଏପରି ପଦକ୍ଷେପ ଗ୍ରହଣ କରୁଥିବାରୁ ବ୍ୟବସାୟୀ ମହଲରେ ଅସନ୍ତୋଷ ଦେଖାଦେଇଛି ।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
