କେନ୍ଦୁଝର: ଜିଲ୍ଲାର ଯୋଡ଼ା ଥାନା ଅନ୍ତର୍ଗତ ବିଲେଇପଦା ଫାଣ୍ଡି କାଣ୍ଡରା ଛକଠାରୁ ଦାମପୁର ଯିବା ବାଟରେ ପୋଲିସ 4 ଝାଡ଼ଖଣ୍ଡି ଲୁଟେରାଙ୍କୁ ଧରିବାରେ ସକ୍ଷମ ହୋଇଛି । ଏହି 4 ଜଣଙ୍କ ମଧ୍ୟରେ ଜଣେ ନାବାଳକ ଥିବା ବେଳେ ଏକ ଆମେରିକାରେ ନିର୍ମିତ ପିସ୍ତଲ ଜବତ ହୋଇଛି ।
ସୋମବାର ପୋଲିସ ପାଟ୍ରୋଲିଂ ସମୟରେ ଝାଡ଼ଖଣ୍ଡ ପଞ୍ଜିକୃତ ଏକ ଯାଇଲୋ ଗାଡିକୁ ସନ୍ଦେହ କରି ଏହାର ପିଛା କରିଥିଲା ଓ ଏହାକୁ କାବୁ କରି ଗାଡିରୁ ଜଣେ ନାବାଳକ ସହିତ 4 ଜଣକୁ ଅଟକ ରଖି ପଚରାଉଚୁରା କରିଥିଲା । ତାଙ୍କଠାରୁ ଗୋଟିଏ ଆମେରିକା ନିର୍ମିତ 9 mm ପିସ୍ତଲ ସହ 7 ହଜାର 500 ଟଙ୍କା ନଗଦ, 6ଟି ମୋବାଇଲ ଓ ଗୋଟିଏ ଦାମୀ କ୍ୟାମେରା ସହ ମଦ ବୋତଲ ଜବତ କରାଯାଇଥିଲା ।
ଏହାସହିତ ସେମାନଙ୍କ ଅପରାଧିକ କାର୍ଯ୍ୟରେ ବ୍ୟବହୃତ ହେଉଥିବା ଯାଇଲୋ ଗାଡିଟିକୁ ଜବତ କରି ମଙ୍ଗଳବାର କୋର୍ଟ ଚାଲାଣ କରିଛି । ସମସ୍ତ ଅପରାଧୀ ଝାଡ଼ଖଣ୍ଡ ରାଜ୍ୟ ଚାଇଁବାସା ଅଂଚଳର ହୋଇଥିବାବେଳେ ଖଣି ଅଂଚଳର ଟ୍ରକଗୁଡିକୁ ଲୁଟ କରିବାକୁ ଉଦ୍ୟମ କରିବା ପୂର୍ବରୁ ଯୋଡ଼ା ପୁଲିସ ଦୁର୍ବୃତ୍ତଙ୍କୁ କାବୁ କରିଛି । କାବୁ ପରେ ସେମାନଙ୍କୁ କୋର୍ଟ ଚାଲାଣ କରି ଅଧିକ ତଦନ୍ତ ଜାରି ରଖିଛି ପୋଲିସ ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
