କେନ୍ଦ୍ରାପଡା: କେନ୍ଦ୍ରାପଡାରେ 30ରୁ ଉର୍ଦ୍ଧ୍ବ ପରିବାର ପାଣି ଘେରରେ । ଜଳ ନିଷ୍କାସନ ପଥ ଅବରୋଧ ଯୋଗୁଁ ଶତାଧିକ ପରିବାର ହନ୍ତସନ୍ତ । କେଉଁଠି ଘର ଭିତରେ ପାଣି ପଶିଛି ତ ଆଉ କେଉଁଠି କଚ୍ଚା ଘର ଭୁଶୁଡି ଗଲାଣି । ଦୀର୍ଘ ଏକ ସପ୍ତାହ ଧରି ବର୍ଷା ଲାଗି ରହିବା ଫଳରେ କେନ୍ଦ୍ରାପଡା ଜିଲ୍ଲା ଆଳି ବ୍ଲକ ପଦନପୁର ବସ୍ତିର ଶତାଧିକ ପରିବାର ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ପଦନପୁର ବସ୍ତିର ଚାରିଆଡେ ବର୍ଷା ପାଣି ଜମି ରହିଛି। ଘରଭିତରୁ ବାହାର ଯାଏ ବର୍ଷା ପାଣି ଲହଡି ଭାଙ୍ଗୁଛି। ବସ୍ତିର ୩୦ରୁ ଉର୍ଦ୍ଧ୍ବ ପରିବାର ଘରଛାଡି ଏବେ ଅନ୍ୟ ଘରେ ଆଶ୍ରୟ ନେଉଛନ୍ତି । ପ୍ରତିବର୍ଷ ବର୍ଷାଋତୁ ଆସିଲେ ଏହି ବସ୍ତିବାସିନ୍ଦା ମାସମାସ ଧରି ଜଳଘେରରେ ରହି ସମସ୍ୟା ଭୋଗୁଥିବା କହିଛନ୍ତି ।
ଏହା ମଧ୍ୟ ପଢ଼ନ୍ତୁ: ଆଳିରେ ବେଆଇନ ବାଲି ଚାଲାଣ, କାର୍ଯ୍ୟାନୁଷ୍ଠାନ ଦାବିରେ ଜିଲ୍ଲାପାଳଙ୍କୁ ଭେଟିଲା ବିଜେପି
ଏନେଇ କେନ୍ଦ୍ରାପଡା ଜିଲ୍ଲାପାଳ, ଆଳି ତହସିଲଦାର ଓ ବିଡ଼ିଓଙ୍କୁ ଲିଖିତ ଭାବେ ଅବଗତ କରିଆସୁଥିଲେ ମଧ୍ୟ ସ୍ଥାୟୀଭାବେ ଜଳ ନିଷ୍କାସନ ପାଇଁ ଅଦ୍ୟାବଧି କୌଣସି ବ୍ୟବସ୍ଥା କରାଯାଉ ନଥିବା ଲୋକେ ଅଭିଯୋଗ କରିଛନ୍ତି । ଅନ୍ୟ ପକ୍ଷରେ ସେ ସ୍ଥାନକୁ ଦେଖିଲା ପରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ଆଳି ତହସିଲଦାର ସୂଚନା ଦେଇଛନ୍ତି ।
ଇଟିଭି ଭାରତ, କେନ୍ଦ୍ରାପଡା
