କେନ୍ଦ୍ରାପଡା: ଜିଲ୍ଲାରେ ଲଜ୍ଜା । କୌଣସି କାମ ପାଇଁ ନାବାଳିକା ବାହାରକୁ ଯାଇଥିବା ବେଳେ ନାବାଳକର ଦୁଷ୍କର୍ମ ଉଦ୍ୟମ । ନାବାଳିକାକୁ ଦୁଇଜଣ ନାବାଳକ ଦୁଷ୍କର୍ମ ପାଇଁ ଉଦ୍ୟମ କରିଥିବା ଅଭିଯୋଗ ହୋଇଛି । କୁଦାନଗରୀ ଥାନା ଅଞ୍ଚଳରୁ ସାମ୍ନାକୁ ଆସିଛି ଏଭଳି ଚାଞ୍ଚଲ୍ୟକର ଘଟଣା । ଅଭିଯୋଗ ପରେ ଦୁଇ ନାବାଳକକୁ ଗିରଫ କରି କୋର୍ଟ ଚାଲାଣ କରିଲା ପୋଲିସ । ଏହି ଘଟଣା ବର୍ତ୍ତମାନ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଅନ୍ୟପଟେ ଅଭିଯୁକ୍ତଙ୍କ ପରିବାର ଅଭିଯୋଗକୁ ଖଣ୍ଡନ କରିଛନ୍ତି ।
ସୂଚନାନୁଯାୟୀ, କୁଦାନଗରୀ ଥାନା ଅଞ୍ଚଳର ଜଣେ ୮ ବର୍ଷୀୟା ନାବାଳିକା କୌଣସି ଏକ କାମ ପାଇଁ ବାହାରକୁ ଯାଇଥିଲା । ଏହି ସମୟରେ ଦୁଇଜଣ ନାବାଳକ ଦୁଷ୍କର୍ମ ଉଦ୍ୟମ କରିଥିବା ନେଇ ନାବାଳିକା ଜଣକ ଅଭିଯୋଗ କରିଛନ୍ତି । ଏନେଇ ନାବାଳିକାର ମାଆ ଗତ ଶୁକ୍ରବାର ରାତିରେ କୁଦାନଗରୀ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ କେନ୍ଦ୍ର କରି କୁଦାନଗରୀ ଥାନା ଅଧିକାରୀ 175/23ରେ ଏକ ମାମଲା ରୁଜ୍ଜୁ କରି ଅଟକ ରଖିଥିଲେ । ପୀଡିତା ନାବାଳିକା ଓ ତାଙ୍କ ମାଙ୍କ ବୟାନ ଆଧାରରେ ଅଭିଯୁକ୍ତମାନଙ୍କ ନାମରେ ପୋକ୍ସୋ ଆଇନ 8, ପିଙ୍ଗଳ କୋଡ଼ ଦଫା 6, 34 ଆଇପିସି, 354, 354(a), 354(b), 341, 242, 323, 294 ଦଫା ଲଗାଯାଇଛି । 2 ଜଣ ନାବାଳକଙ୍କୁ ଡାକ୍ତରୀ ମାଇନା କରାଯାଇ ଜୁଭେନାଇଲ ଜଷ୍ଟିସ କୋର୍ଟରେ ହାଜର କରାଯାଇଛି । କିନ୍ତୁ ନାବାଳକ ଦୁହିଁଙ୍କ ବାପା ତାଙ୍କ ପୁଅ ନାମରେ ଥିବା ଅଭିଯୋଗକୁ ଖଣ୍ଡନ କରିଛନ୍ତି ।
ଏନେଇ କେନ୍ଦ୍ରାପଡା ଉପଖଣ୍ଡ ଆରକ୍ଷୀ ଅଧିକ୍ଷକ କହିଛନ୍ତି, "ନାବାଳିକାକୁ ଉକ୍ତ ଗ୍ରାମର ହିଁ ଦୁଇଜଣ ନାବାଳକ ଦୁଷ୍କର୍ମ କରିବାକୁ ଉଦ୍ୟମ କରିଥିବା ନେଇ ନାବାଳିକାର ମାଆ ଥାନାରେ ଅଭିଯୋଗ କରିଛନ୍ତି । ଅଭିଯୋଗ ଅନୁସାରେ କୁଦାନଗରୀ ଥାନାରେ 175/23ରେ ଏକ ମାମଲା ରୁଜୁ ହୋଇଛି । ଦୁଇ ଅଭିଯୁକ୍ତ ମଧ୍ୟ ନାବାଳକ ଅଟନ୍ତି । ସେମାନଙ୍କୁ ଗିରଫ କରାଯାଇ ଡାକ୍ତରୀ ପରୀକ୍ଷା କରାଯାଇଛି । ପୀଡିତା ନାବାଳିକାର ମଧ୍ୟ ମେଡିକାଲ ଟେଷ୍ଟ କରାଯାଇଥିବା ବେଳେ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ।"
ଇଟିଭି ଭାରତ, କେନ୍ଦ୍ରାପଡା
