କେନ୍ଦ୍ରାପଡ଼ା: ଜିଲ୍ଲାର ରାଜପଥରେ ପୁଣି ଏକ ମର୍ମନ୍ତୁଦ ଦୁର୍ଘଟଣା । ଆଜି ସକାଳେ ହୋଇଥିବା ଦୁର୍ଘଟଣାରେ ମାଆ ଓ ନବଜାତକ ମୃତ୍ୟୁବରଣ କରିଥିବା ଘଟଣା ମନରୁ ନଯାଉଣୁ ଅପରାହ୍ନରେ ଗୋପଛକ ନିକଟରେ ଥିବା ପେଟ୍ରୋଲ ପମ୍ପ ନିକଟରେ ପୁଣି ଘଟିଛି ଦୁର୍ଘଟଣା। ରାସ୍ତାରେ ଛିଡା ହୋଇଥିବା ଏକ ଟ୍ରକକୁ ପଛପଟୁ ଆଉ ଏକ ଟ୍ରକ ପିଟିବା ଫଳରେ ଘଟଣାସ୍ଥଳରେ ଦୀର୍ଘ ଦୁଇ ଘଣ୍ଟା ଧରି ଫସି ରହିଥିଲା ଡ୍ରାଇଭର । ଡ୍ରାଇଭର ଜଣଙ୍କ ଢେଙ୍କାନାଳ ଜିଲ୍ଲା ଛୋଟତେନ୍ତୁଳି ଗାଁର କାଶୀନାଥ ମହାନ୍ତ ବୋଲି ଜଣାପଡିଛି।
ଖବର ପାଇ କେନ୍ଦ୍ରାପଡ଼ା ଅଗ୍ନିଶମ ବିଭାଗ, ସ୍ଥାନୀୟ ଯୁବକ ଓ ପୋଲିସ ସହାୟତା ଫଳରେ ଫସି ରହିଥିବା ଟ୍ରକ ଡ୍ରାଇଭରକୁ ଜେସିବି ସାହାଯ୍ୟରେ ଟଣାଯାଇ ଗ୍ୟାସ କଟରରେ କଟାଯିବା ପରେ ଉଦ୍ଧାର କରାଯାଇଥିଲା । ଗୁରୁତର ଅବସ୍ଥାରେ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟ ଓ ପରେ କଟକ ସ୍ଥାନାନ୍ତର କରାଯାଇଛି ।
ସୂଚନାଯୋଗ୍ୟ, ଗତକାଲି ବିଳମ୍ବିତ ରାତିରେ କୌଣସି କାରଣରୁ ଏକ ଟ୍ରକ ଖରାପ ହୋଇ ରାସ୍ତାକଡ଼ରେ ଛିଡା ହୋଇଥିଲା। ଆଜି ଅପରାହ୍ନରେ ଯୋଡ଼ାରୁ ଲୁହାପଥର ଧରି ଆସୁଥିବା ଗାଡି ନମ୍ବର (OR05AJ-2451) ଟ୍ରକଟି ପଛପଟୁ ଧକ୍କା ଦେଇଥିଲା।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
