କେନ୍ଦ୍ରାପଡା: ଅନ୍ଧବିଶ୍ବାସର ଅନ୍ଧଗଳିରେ କେନ୍ଦ୍ରାପଡ଼ା। ଗୁଣି ଗାରେଡ଼ିରେ ଚାଲିଛି ରୋଗୀ ଚିକିତ୍ସା । ଅଚେତ୍ ଅବସ୍ଥାରେ ପଡିଥିବା ଜଣେ ନାବାଳକକୁ ସୁସ୍ଥ କରିବା ପାଇଁ ପ୍ରାଣମୂର୍ଚ୍ଛା ଉଦ୍ୟମ କରି ବିଫଳ ହେଉଛି ଗୁଣିଆ । ଏମିତି ଚିତ୍ର ଦେଖିବାକୁ ମିଳିଛି କେନ୍ଦ୍ରାପଡ଼ା ସହର ଠାରୁ ମାତ୍ର ୧୦କିମି ପରିଧି ମଧ୍ୟରେ ଥିବା ଗୋଗୁଆ ଛକର ଗାଙ୍ଗପଡା ଗ୍ରାମରେ ।
ଗାଁର ଟୁକୁନା ଜେନାଙ୍କ ୭ ବର୍ଷର ପୁଅକୁ ମନ୍ତୁରା ପାଣିରେ ଗୁଣିଆ ଝଡ଼ାଫୁଙ୍କା କରୁଥିବାର ଦୃଶ୍ୟ ଦେଖିବା ପାଇଁ ମିଳିଛି। ମିଳିଥିବା ଖବର ଅନୁଯାୟୀ ପିଲାଟି ଆଜି ସକାଳୁ ହଠାତ ଅସୁସ୍ଥ ହୋଇ ପଡିଥିଲା। ପିଲାଟିକୁ ବାତ ମାରିବା ଆଶଙ୍କା କରି ପରିବାର ଲୋକେ ତାକୁ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ସେଠାରୁ ରୋଗୀକୁ କଟକ ସ୍ଥାନାନ୍ତର ପାଇଁ ଡାକ୍ତର ପରାମର୍ଶ ଦେଇଥିଲେ ।
କିନ୍ତୁ ପରିବାର ତାକୁ ଡାକ୍ତରଙ୍କ ପାଖକୁ ନେବା ପରିବର୍ତ୍ତେ ଗୁଣିଆ ପାଖକୁ ନେଇ ଝଡ଼ାଫୁଙ୍କା ଆରମ୍ଭ କରି ଦେଇଥିଲେ । ଗତ 18 ଘଣ୍ଟା ଭିତରେ ଦୁଇ ଦୁଇ ଜଣ ଗୁଣିଆ ପିଲାଟିକୁ ଝଡାଫୁଙ୍କା କରିଥିବା ନେଇ ସୂଚନା ମିଳିଛି । ତେବେ ଅସୁସ୍ଥ ନାବାଳକର ମୃତ୍ୟୁ ହୋଇଯାଇଥିବା କୁହାଯାଉଥିବା ବେଳେ ପରିବାର ପକ୍ଷରୁ ଏନେଇ କୌଣସି ପ୍ରତିକ୍ରିୟା ମିଳିପାରିନାହିଁ ।
ଖବର ପ୍ରଚାର ହୋଇଯିବା ପରେ ସମ୍ପୃକ୍ତ ଗୁଣିଆ ଗାଁ ଛାଡି ପଳାଇଥିବା ଜଣlପଡିଛି । ଯଦି ରୋଗୀଟି ବଞ୍ଚି ରହିଥାଏ ତେବେ ତାର ଚିକିତ୍ସା ତୁରନ୍ତ କରିବାର ଆବଶ୍ୟକତା ରହିଛି। ଅନ୍ୟପକ୍ଷରେ ଅନ୍ଧବିଶ୍ବାସର ବଶବର୍ତ୍ତୀ ହୋଇ କାହାର ଜୀବନ ସହ ଖେଳ ଖେଳିବା କେତେଦୂର ଯାଥାର୍ଥ ତାହା ଏବେ ଆଲୋଚନାର ବିଷୟ ପାଲଟିଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
