କେନ୍ଦ୍ରାପଡ଼ା: ଜିଲ୍ଲାରେ ପୁଣି ବଧୂ ହତ୍ୟା ଅଭିଯୋଗ । ଝିଅକୁ ତଣ୍ଟି ଚିପି ଶାଶୁଘର ଲୋକେ ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଛନ୍ତି । କେନ୍ଦ୍ରାପଡ଼ା ଜିଲ୍ଲା ରାଜକନିକା ଥାନା ଅନ୍ତର୍ଗତ ଆୟତନ ପଞ୍ଚାୟତର ଗଙ୍ଗାଧର ପ୍ରସାଦ ଡିହା ଗ୍ରାମରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି । ଏନେଇ ରାଜକନିକା ଥାନାରେ ଅଭିଯୋଗ ପରେ ମୃତ ମହିଳାଙ୍କ ଶ୍ବଶୁରଙ୍କୁ ଅଟକ ରଖି ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ଏହା ମଧ୍ୟ ପଢ଼ନ୍ତୁ: ଟଙ୍କା ପାଇଁ ବଧୂ ହତ୍ୟା ! ଝୁଲନ୍ତା ଅବସ୍ଥାରେ ମହିଳାଙ୍କ ମୃତଦେହ ଉଦ୍ଧାର
ସୂଚନା ଅନୁଯାୟୀ, ବିରାଡିଆ ଗ୍ରାମର ଗୋଲେଖ ବେହେରାଙ୍କ ଝିଅ ତରୁଲତା ବେହେରା 2018 ମସିହାରେ ଗଙ୍ଗାଧର ପ୍ରସାଦ ଡିହା ଗ୍ରାମର ଶ୍ରୀକାନ୍ତ ବେହେରାଙ୍କ ପୁଅ ସୁଶାନ୍ତ ବେହେରାଙ୍କୁ ବୈଦିକ ରୀତିରେ ବିବାହ କରିଥିଲେ । ଗତ ବିଳମ୍ବିତ ରାତିରେ ତରୁଲତାଙ୍କ ସନ୍ଦେହଜନକ ମୃତ୍ୟୁ ହୋଇଛି । ମହିଳାଙ୍କ ପରିବାର ଲୋକେ ଝିଅକୁ ତଣ୍ଟି ଚିପି ହତ୍ୟା କରିଥିବା ଅଭିଯୋଗ କରୁଥିବା ବେଳେ ଶାଶୁ ଘର ଲୋକେ ଏହାକୁ ବିରୋଧ କରିଛନ୍ତି ।
ଶ୍ବାସ ଜନିତ ରୋଗ ଥିବାରୁ ବୋହୂର ମୃତ୍ୟୁ ଘଟିଥିବା ମହିଳାଙ୍କ ଶାଶୁ କହିଛନ୍ତି । ତରୁଲତାଙ୍କ ଶାଶୁଘର ଲୋକେ ତାଙ୍କ ମୃତଦେହକୁ ରାଜକନିକା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିବା ପରେ ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏଥିସହ ତରୁଲତାଙ୍କ ଶ୍ବଶୁର ଶ୍ରୀକାନ୍ତଙ୍କୁ ଥାନାରେ ଅଟକ ରଖି ପଚରାଉଚରା କରୁଛି ପୋଲିସ । ତରୁଲତାଙ୍କ ସ୍ୱାମୀ ସୁଶାନ୍ତ ବିଦେଶରେ ରହୁଥିବା ପରିବାର ପକ୍ଷରୁ ସୂଚନା ମିଳିଥିବା ବେଳେ ପୋଲିସ ଘଟଣାର ତଦନ୍ତ ଜାରି ରଖିଛି ।
ଏହା ମଧ୍ୟ ପଢ଼ନ୍ତୁ: ପୁଣି ଯୌତୁକ ଜୁଇରେ ବଧୂ, ସ୍ବାମୀରେ ଥାନାରେ ଅଟକ
ଅନ୍ୟପଟେ ରାଜନଗର ତାଳଚୁଆ ଥାନା ଅନ୍ତର୍ଗତ ତାଳଚୁଆ ଗ୍ରାମରେ ମହିଳାଙ୍କ ସନ୍ଦେହଜନକ ମୃତ୍ୟୁ ଘଟିଛି । ତାଳଚୁଆ ଗ୍ରାମ ସୋମାରାଣୀ ବେରା ମଧ୍ୟାହ୍ନରେ ଘରେ ନିଜ ଜୀବନ ହାରିଥିବା ଶାଶୁଘର ଲୋକେ କହିଛନ୍ତି । ରାଜନଗର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ମୃତଦେହକୁ ଛାଡି ସ୍ୱାମୀ ଓ ସାନ ଯାଆ ଫେରାର ହୋଇଯିବା ଘଟଣା ସମ୍ପର୍କରେ ଅନେକ କିଛି ବୟାନ କରୁଛି । ତାଳଚୁଆ ଗ୍ରାମର ନନ୍ଦକୁମାର ବେରାଙ୍କ ସହ ଗତ ଦୁଇ ବର୍ଷ ତଳେ ସୋମାରାଣୀଙ୍କ ବିବାହ ହୋଇଥିଲା । ତେବେ ମୃତଦେହକୁ ଛାଡି ସ୍ୱାମୀ ଓ ଯାଆ ଫେରାର ହୋଇଯିବା ଖବର ପାଇ ରାଜନଗର ପୋଲିସ ନିଜ ଆଡୁ ମୃତଦେହକୁ ଜବତ କରି ତଦନ୍ତ ଜାରି ରଖିଛି ।
ଇଟିଭି ଭାରତ, କେନ୍ଦ୍ରାପଡ଼ା
