କେନ୍ଦ୍ରାପଡା: ଦିନେ ନୁହେଁ କି ଦୁଇ ଦିନ ନୁହେଁ । ଦୀର୍ଘ ଦୁଇମାସରୁ ଅଧିକ ସମୟ ଧରି ବିଦ୍ୟାଳୟକୁ ଆସୁନାହାଁନ୍ତି ଶିକ୍ଷକ । ବିଦ୍ୟାଳୟ ମିଶ୍ରଣର ସିଧାସଳଖ କୁପ୍ରଭାବ ପଡିଛି ଛାତ୍ରଛାତ୍ରୀ ମାନଙ୍କ ଭବିଷ୍ୟତ ଉପରେ । ଗୋଟିଏ ପଟେ ଆରିପଦା ବିଦ୍ୟାଳୟରେ ମିଶିଥିବା କାରଣ ଯୋଗୁଁ ବସୁପୁର ବିଦ୍ୟାଳୟକୁ ଶିକ୍ଷକ କିମ୍ବା ଶିକ୍ଷୟିତ୍ରୀ ଆସୁନଥିବା ଅଭିଯୋଗ ହୋଇଛି ।
ବିଦ୍ୟାଳୟକୁ ଆସୁନାହାଁନ୍ତି ଶିକ୍ଷକ;ଜିଲ୍ଲାପାଳଙ୍କୁ ଭେଟିଲେ ଛାତ୍ରଛାତ୍ରୀ
ସେପଟେ ପ୍ରଥମ ଶ୍ରେଣୀରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୨୨ଜଣ ଛାତ୍ରଛାତ୍ରୀଙ୍କୁ ପଢ଼ାଉଛନ୍ତି ଗାଁର ଜଣେ ଯୁବତୀ । ଅଭିଭାବକ ମାନଙ୍କ ପକ୍ଷରୁ ବାରମ୍ବାର ଏନେଇ ପ୍ରଶାସନ ଦୃଷ୍ଟି ଆକର୍ଷଣ କରାଯାଉଥିଲେ ମଧ୍ୟ ଏନେଇ କେହି କର୍ଣ୍ଣପାତ କରୁନଥିବାରୁ ଶନିବାର ଛାତ୍ରଛାତ୍ରୀ ଓ ଅଭିଭାବକ ମିଳିତ ଭାବରେ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ଧାରଣା ପ୍ରଦର୍ଶନ କରିଥିଲେ ।
ତେବେ ଜିଲ୍ଲାପାଳ ଏନେଇ ଶୀଘ୍ର ପଦକ୍ଷେପ ନେବାପାଇଁ ପ୍ରତିଶ୍ରୁତି ଦେବାପରେ ଛାତ୍ରଛାତ୍ରୀ ଧାରଣାରୁ ଓହରିଥିବା ସୂଚନା ମିଳିଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
