କେନ୍ଦ୍ରାପଡ଼ା: କଂଗ୍ରେସରୁ ଇସ୍ତଫା ଦେଲେ ରାଜ୍ୟ ସାମାଜିକ ଗଣମାଧ୍ୟମ ସାଧାରଣ ସମ୍ପାଦକ ସମ୍ବିତ ଶ୍ରୀଚନ୍ଦନ। ସମ୍ବିତ ଦୀର୍ଘଦିନ ଧରି କଂଗ୍ରେସ ଦଳର ମଙ୍ଗ ସମ୍ଭାଳିଥିବା ବେଳେ ଆଜି ଦଳୀୟ କାର୍ଯ୍ୟ ଉପରେ ଅସନ୍ତୋଷ ବ୍ୟକ୍ତ କରି ଜିଲ୍ଲା ସଭାପତି ଅଂଶୁମାନ ମହାନ୍ତିଙ୍କୁ ଇସ୍ତଫା ପତ୍ର ଦେଇଛନ୍ତି । ଏନେଇ ସେ ସୋସିଆଲ ମିଡିଆରେ ଜଣାଇଛନ୍ତି ।
ସମ୍ବିତ ନିଜ ଇସ୍ତଫା ପତ୍ରରେ "ଜଣେ ଯୁବକ ଭାବରେ ସେ ପାର୍ଟିରେ ଅବହେଳିତ ଏବଂ ଅପମାନିତ ଅନୁଭବ କରୁଥିବା ଓ ପାର୍ଟିରେ ଭଲ ବାତାବରଣ ନଥିବା କଥା ଉଲ୍ଲେଖ କରିଛନ୍ତି । ଏଥି ସହ ଦଳୀୟ ନେତୃତ୍ୱ କୋମାରେ ଥିବା ଲେଖିଛନ୍ତି । ଜିଲ୍ଲା କଂଗ୍ରେସ କମିଟିର ଅଫିସ ଧାରକଙ୍କ ସଂଖ୍ୟା ବହୁତ ରହିଥିବା ବେଳେ କୌଣସି କାର୍ଯ୍ୟକର୍ତ୍ତାଙ୍କୁ ନିର୍ଦ୍ଧିଷ୍ଟ ଦାୟିତ୍ୱ ପ୍ରଦାନ କରାଯାଇନାହିଁ ।
ଆଗକୁ ପଞ୍ଚାୟତ ଓ ପୌର ନିର୍ବାଚନ ରହିଥିବାରୁ ଦଳୀୟ ନେତୃତ୍ୱ କେବଳ ଟିକେଟ ପ୍ରଦାନରେ ବ୍ୟସ୍ତ ରହିଥିବା ଦାୟିତ୍ୱ ନେବାକୁ ପ୍ରସ୍ତୁତ ନଥିବା ଅସନ୍ତୋଷ ଜାହିର କରିଛନ୍ତି ସେ । କଂଗ୍ରେସ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିବା କହିଛନ୍ତି ସମ୍ବିତ ଶ୍ରୀଚନ୍ଦନ ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି,ଇଟିଭି ଭାରତ
