କେନ୍ଦ୍ରାପଡ଼ା: ଛାତ୍ରୀଙ୍କୁ ଅସଦାଚରଣ କରି ଖୋଲାଖୋଲି ଭାବେ ବାହାରେ ବୁଲୁଥିବା ଅଭିଯୁକ୍ତକୁ ଗିରଫ ଦାବିରେ ଥାନାର ଦ୍ବାରସ୍ଥ ହେଲେ ମହାକାଳପଡ଼ା ବିଧାନସଭା ନିର୍ବାଚନ ମଣ୍ଡଳୀ ମହିଳା ମୋର୍ଚ୍ଚା । ସାତଦିନ ମଧ୍ୟରେ ଦାବି ପୂରଣ ନହେଲେ ଆମରଣ ଅନଶନ ଚେତାବନୀ ସହ ଏଥିପାଇଁ ପୋଲିସ ପ୍ରଶାସନ ଦାୟୀ ରହିବ ବୋଲି ଉଲ୍ଲେଖ କରି ଦାବିପତ୍ର ପ୍ରଦାନ କରାଯାଇଛି ।
ଅଭିଯୋଗ ଅନୁଯାୟୀ, ମହାକାଳପଡ଼ା ବିଜୟନଗର ଅଞ୍ଚଳର ଏକ ବିଦ୍ୟାଳୟରେ ଜନୈକା ଦଶମ ଶ୍ରେଣୀର ଛାତ୍ରୀଙ୍କୁ ଉକ୍ତ ବିଦ୍ୟାଳୟର ଗଣିତ ଶିକ୍ଷକ ବିଶ୍ବମ୍ବର ପରିଡା ଅସଦାଚରଣ କରିଥିବା ନେଇ ମହାକାଳପଡ଼ା ଥାନାରେ ଅଭିଯୋଗ ହୋଇଥିଲା । ଅଭିଯୋଗ ପ୍ରମାଣିତ ହୋଇଥିଲେ ସୁଦ୍ଧା ଭିଜିଲାନ୍ସ ଦ୍ବାରା ଗିରଫ ହୋଇଥିବା ଜିଲ୍ଲା ଶିକ୍ଷାଧିକାରୀ ଶିକ୍ଷକ ବିଶ୍ବମ୍ବରଙ୍କୁ ତରବରିଆ ଭାବେ ରାଜନଗର ବ୍ଳକକୁ ବଦଳି କରିଦେଇଥିଲେ । ତେବେ ପୋଲିସ ବିଶ୍ବମ୍ବରକୁ ଗିରଫ ନକରିବା ସୁରକ୍ଷାକୁ ନେଇ ବଡ଼ ପ୍ରଶ୍ନ ସୃଷ୍ଟି ହୋଇଛି ।
ଅନ୍ୟପଟେ ରାଜନଗର ଗୋଷ୍ଠୀ ଶିକ୍ଷାଧିକାରୀଙ୍କ କାର୍ଯ୍ୟାଳୟରେ କାମ କରୁଥିବା ବିଶ୍ବମ୍ବର ମହାକାଳପଡ଼ା ଅଞ୍ଚଳରେ ବୁଲୁଥିବାପବେଳେ ପୀଡ଼ିତା ଏବଂ ତାଙ୍କ ପରିବାର ଭୟରେ ରହିବା ନେଇ ମହିଳା ମୋର୍ଚ୍ଚା ଅଭିଯୋଗ କରିଛି । ଆସନ୍ତା ସାତଦିନ ମଧ୍ୟରେ ଅଭିଯୁକ୍ତକୁ ଗିରଫ କରାନଗଲେ ମହିଳା ମୋର୍ଚ୍ଚା ଅନଶନକୁ ଓହ୍ଲାଇବ ବୋଲି ଚେତାବନୀ ଦିଆଯାଇଛି ।
ଇଟିଭି ଭାରତ, କେନ୍ଦ୍ରାପଡ଼ା
