କେନ୍ଦ୍ରାପଡା: ରତ୍ନ ସିଂହାସନରୁ ଓହ୍ଲାଇ ସ୍ନାନମଣ୍ଡପକୁ ବିଜେ କରିବେ ଆରାଧ୍ୟ ପ୍ରଭୁ ବଳଦେବଜୀଉଙ୍କ ସମେତ ମା'ସୁଭଦ୍ରା, ସାନଭାଇ ଜଗନ୍ନାଥ ଓ ଶ୍ରୀ ସୁଦର୍ଶନ । ସକାଳ ୬ରୁ ପ୍ରଭୁଙ୍କ ରତ୍ନବେଦୀରୁ ସେବାୟତ ମାନେ ସ୍ନାନମଣ୍ଡପକୁ ଆଣିବାକୁ ଥିବା ବେଳେ ଆଜି ରାତିରୁ ସୁବାସିତ ମନ୍ତ୍ରସିଦ୍ଧ ୧୦୮ ଗରା ସୁବାସିତ ଜଳରେ ସ୍ନାନ କରିବେ ଚତୁର୍ଦ୍ଧାମୂର୍ତ୍ତି ।
କୋଭିଡ କଟକଣା ପାଇଁ ଭକ୍ତ ଓ ଶ୍ରଦ୍ଧାଳୁଙ୍କ ମନ୍ଦିର ପ୍ରବେଶ ବାରଣ କରାଯାଇଛି । ସକାଳ ୭ ଟାରେ ଜୟ ମଙ୍ଗଳ ଆଳତୀ, ୧୦ରେ ନୀତିସ୍ନାନ, ମଧ୍ୟାହ୍ନ ୧୨ରେ ବଲ୍ଲଭ ମଣୋହୀ, ଅପରାହ୍ନ ୧ରେ ମଙ୍ଗଳାର୍ପଣ,୧.୩୦ରେ ଗଜବେଦନ ବେଶ ସହ ଅପରାହ୍ନ ୨ ଘଟିକାରେ ଖେଚୁଡ଼ି ଧୂପ କରାଯାଇ ରାତ୍ର ୮ ଘଟିକାରେ ଅଣସର ଗୃହକୁ ପ୍ରବେଶ କରିବେ ମହାପ୍ରଭୁ ।
ପୁରୀ ବ୍ୟତୀତ ଅନ୍ୟ କୌଣସି ସ୍ଥାନରେ ରଥଯାତ୍ରା ଉପରେ ଆଜି ମାନ୍ୟବର ଉଚ୍ଚ ନ୍ୟାୟାଳୟ ସ୍ପଷ୍ଟ ଭାବରେ ମନା କରିଥିବା ବେଳେ ପୂର୍ବ ଯୋଜନା ମୁତାବକ ସେବାୟତ ମାନେ ତୁଳସୀକ୍ଷେତ୍ରରେ ରଥଯାତ୍ରା ପାଇଁ ଆସନ୍ତାକାଲି ମନ୍ଦିରରେ ଅଖଣ୍ଡ ଦୀପ ଜାଳିବେ । ଏଥିସହ ଜିଲ୍ଲାବାସୀଙ୍କୁ ନିଜ ନିଜ ଘରେ କଳସ ସ୍ଥାପନକରି ପୂଜା କରିବା ସହ ଘିଅ ଦୀପ ଜାଳିବା ପାଇଁ ଅନୁରୋଧ କରିଛନ୍ତି ସେବାୟତ ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
