କେନ୍ଦ୍ରାପଡ଼ା: ରାଜ୍ୟର 146ଟି ବିଧାନସଭା ଆସନରେ ନିର୍ବାଚନ ଶେଷ ହୋଇଥିବା ବେଳେ ପାଟକୁରାରେ ଆସନ୍ତା ୨୦ ତାରିଖରେ ହେବ ନିର୍ବାଚନ। ଏନେଇ ଉଭୟ ବିଜେପି ଓ ବିଜେଡି ଦଳର ନେତୃବୃନ୍ଦ ପାଟକୁରାରେ ପକାଇଛନ୍ତି ଡେରା । ବିଜେଡି, ବିଜେପି ଓ କଂଗ୍ରେସ ଦଳ ୪୦ଜଣିଆ ଷ୍ଟାର ପ୍ରଚାରକ ତାଲିକା ପ୍ରକାଶ କରିବା ପରେ ସରଗରମ ହୋଇଛି ନିର୍ବାଚନୀ ପ୍ରଚାର।
ପାଟକୁରା ଦଖଲ କରିବାକୁ ପଞ୍ଚାୟତୱାରି ଡେରା ପକାଇଲଣି ବିଜେପି ଓ ବିଜେଡ଼ି ନେତା । ସମସ୍ତଙ୍କ ନଜରରେ ପାଟକୁରା ଭୋଟର । ଗୋଟିଏ ପଟେ 20 ବର୍ଷ ଧରି ବିଧାନସଭାକୁ ଯାଇ ପାରିନଥିବା ବିଜୟ ମହାପାତ୍ର ଚଳିତ ବର୍ଷ ବିଜେପି ଟିକେଟରୁ ବିଜୟ ଲାଭ କରି ପୁନର୍ବାର ଜିତିବାକୁ ଆଶାବାନ୍ଧି ବସିଛନ୍ତି । ସେହିପରି ପାଟକୁରାରୁ ଜିତି ଆସୁଥିବା ବିଜୁ ଅମଳର ନେତା ବେଦପ୍ରକାଶ ଅଗ୍ରୱାଲଙ୍କ ମୃ୍ତ୍ୟୁ ପରେ ପତ୍ନୀ ସାବିତ୍ରୀଙ୍କୁ ପ୍ରାର୍ଥୀ କରିଛି ବିଜେଡ଼ି । ଅନ୍ୟପଟେ ପାଟକୁରା ପାଇଁ କଂଗ୍ରେସ ମଙ୍ଗ ଧରିଛନ୍ତି ଜୟନ୍ତ ମହାନ୍ତି । ଏଥିପାଇଁ ସମସ୍ତ ରାଜନୈତିକ ଦଳ ନିର୍ବାଚନ ମଣ୍ଡଳୀ ପାଇଁ 40 ଜଣିଆ ଷ୍ଟାର ପ୍ରଚାରକ ତାଲିକା ମଧ୍ୟ ଘୋଷଣା କରି ସାରିଲଣି । ତେଣେ କ୍ଷମତା ଦଖଲ କରିବାକୁ ବିଜେପି ଓ ବିଜେଡ଼ିର ନେତା ଆରୋପ ପ୍ରତ୍ୟାରୋପ ଆରମ୍ଭ କରି ଦେଇଛନ୍ତି ।
ପାଟକୁରା ନିର୍ବାଚନ ମଣ୍ଡଳୀ ଅନ୍ତର୍ଗତ ଡେରାବିଶ ବ୍ଲକ ପାଇଁ ବିଜେଡ଼ି ବରିଷ୍ଠ ମନ୍ତ୍ରୀ ଅରୁଣ ସାହୁ, ସମୀର ରଞ୍ଜନ ଦାସ, ପୂର୍ବତନ ବିଧାୟକ ସଞ୍ଜୟ ଦାସବର୍ମାଙ୍କ ଭଳି ନେତାଙ୍କୁ ଦାୟିତ୍ବ ଦେଇଥିବା ବେଳେ ଗରଦପୁର ବ୍ଲକ ପାଇଁ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଓ ମାର୍ଶାଘାଇ ବ୍ଲକରେ ଥିବା ସାତୋଟି ପଞ୍ଚାୟତ ପାଇଁ ମନ୍ତ୍ରୀ ପ୍ରଫୁଲ୍ଲ ମଲ୍ଲିକଙ୍କୁ ପର୍ଯ୍ୟବେକ୍ଷକ ଭାବେ ଦାୟିତ୍ବ ଦେଇଛି । ଏପଟେ ବିଜେପି ତା’ର ଷ୍ଟାର ପ୍ରଚାରକ ଭାବରେ ୪୦ଜଣିଆ ଟିମ ଘୋଷଣା କରିଥିଲେ ହେଁ ବର୍ତ୍ତମାନ ସୁଦ୍ଧା କେବଳ କେନ୍ଦ୍ରମନ୍ତ୍ରୀ ପ୍ରତାପ ଚନ୍ଦ୍ର ଷଡଙ୍ଗୀ, ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ, ରାଷ୍ଟ୍ରୀୟ ଉପାଧ୍ୟକ୍ଷ ତଥା କେନ୍ଦ୍ରାପଡ଼ାର ପୂର୍ବତନ ସାଂସଦ ବୈଜୟନ୍ତ ପଣ୍ଡା, ଭୃଗୁ ବକ୍ସିପାତ୍ର, କନକ ବର୍ଦ୍ଧନ ସିଂହଦେଓ, ବିଷ୍ଣୁ ସେଠୀଙ୍କ ଭଳି ନେତା ପ୍ରଚାରର ମଙ୍ଗ ସମ୍ଭାଳିଛନ୍ତି ।
ଗୋଟିଏ ପଟେ ଗତ ନିର୍ବାଚନରେ କେନ୍ଦ୍ରାପଡ଼ା ସଂସଦୀୟ କ୍ଷେତ୍ରରେ ବିଜେଡ଼ି ସାଂସଦ ସମେତ ସମସ୍ତ ବିଧାୟକ ବାଜିମାତ କରିଥିବାବେଳେ ପାଟକୁରା ହାତେଇବାକୁ ସମ୍ପୂର୍ଣ୍ଣ ଆଶାବାଦୀ ରହିଛି ଦଳ । ଅନ୍ୟପଟେ ବିଜେପିର ସାଂସଦ ପ୍ରାର୍ଥୀ ବୈଜୟନ୍ତ ପଣ୍ଡା ପରାଜୟ ବରଣ କରିଥିବା ସତ୍ତ୍ବେ ମଧ୍ୟ ପାଟକୁରାରୁ ବିଜେଡ଼ି ପ୍ରର୍ଥୀଙ୍କଠାରୁ ସର୍ବାଧିକ ଭୋଟ ପାଇଥିଲେ । ତେଣୁ ବିଜୟ ମହାପାତ୍ରଙ୍କୁ ନିର୍ବାଚନ ମଣ୍ଡଳୀବାସୀ ବିଜୟ ଟିକା ପିନ୍ଧାଇବେ ବୋଲି ଦୃଢ ନିଶ୍ଚିତ ବିଜେପି ।
ତେଣେ ପରିବର୍ତ୍ତିତ ପରିସ୍ଥିତିରେ ପାଟକୁରା ଭୋଟର କାହା ମୁଣ୍ଡରେ ବିଜୟ ମୁକୁଟ ପିନ୍ଧାଇବେ ତାହା ସମୟ ହିଁ କହିବ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
