କେନ୍ଦ୍ରାପଡା: ଦୁର୍ଘଟଣାଗ୍ରସ୍ତଙ୍କୁ ଉଦ୍ଧାର କରି ମାନବିକତାର ପରିଚୟ ଦେଇଛନ୍ତି ପୋଲିସ ବାବୁ । ଦୁର୍ଘଟଣାର ଶିକାର ଦୁଇ ଜଣଙ୍କୁ ରାସ୍ତା ଉପରେ ବେସାହାରା ପଡିଥିବାର ଦେଖି ସହାୟତାର ହାତ ବଢାଇଛନ୍ତି ତାଳଚୁଆ ମେରାଇନ ଥାନା ଅଧିକାରୀ ଶ୍ରୀକାନ୍ତ ବାରିକ । ଘଟଣାଟି ହେଉଛି ଜରିମୂଳ ଛକର । ଯେଉଁଠାରେ ଗୁରୁବାର ବାଛୁରୀ ସହ ପିଟି ହୋଇ ଗୁରୁତର ହୋଇଥିଲେ ଦୁଇଜଣ ।
ଥାନାରୁ କେନ୍ଦ୍ରାପଡା କୋର୍ଟ ଅଭିମୁଖେ ଯାଉଥିବା ସମୟରେ ଏହି ଘଟଣାକୁ ଦେଖି ଅଟକି ଯାଇଥିଲେ ପୋଲିସ ବାବୁ । ଘଟଣାରେ ଜଣେ ଯୁବକଙ୍କ ଡାହାଣ ଗୋଡ ଭାଙ୍ଗିଥିବା ବେଳେ ଅନ୍ୟ ଜଣେ ବୃଦ୍ଧଙ୍କ ମୁହଁ ମାଡ ହୋଇଥିଲା । ତେବେ ଏସବୁ ଦେଖିବା ପରେ କାଳ ବିଳମ୍ବ କରି ସେମାନଙ୍କୁ ଶ୍ରୀକାନ୍ତ ତୁରନ୍ତ ନିଜ ପୋଲିସ ଭ୍ୟାନ ଯୋଗେ ଚିକିତ୍ସା ପାଇଁ ରାଜନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ ।
କାର୍ଯ୍ୟରତ ପୋଲିସ ବାବୁଙ୍କର ଏହି ମହାନୀୟତାକୁ ନେଇ ଏବେ ଚାରିଆଡୁ ଛୁଟୁଛି ପ୍ରଶଂସାର ସୁଅ । ତେଣେ ଏହା ପୂର୍ବରୁ ବାତ୍ୟା ଫନି ସମୟରେ ଜଣେ ପ୍ରସୂତି ଓ ତାଙ୍କ ଦୁଇ ମାସର ଶିଶୁଙ୍କୁ ଉଦ୍ଧାର କରି ନିରାପଦ ସ୍ଥାନକୁ ଆଣିବା ପରେ ଚର୍ଚ୍ଚାକୁ ଆସିଥିଲେ ଶ୍ରୀକାନ୍ତ ବାରିକ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
