କେନ୍ଦ୍ରାପଡା: ଘରେ ପଶି ମହିଳା ଓ ତାଙ୍କ ପୁଅକୁ ମରଣାନ୍ତକ ଆକ୍ରମଣ । ମାଆ ଓ ପୁଅ ଗୁରୁତର ଆହତ ହୋଇ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହେବା ପରେ ସେଠାରେ ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ହେବାରୁ କଟକ ବଡ ମେଡିକାଲକୁ ସ୍ଥାନାନ୍ତର । ଏପରି ଏକ ଘଟଣା ଘଟିଛି କେନ୍ଦ୍ରାପଡା ଜିଲ୍ଲା ସାମୁଦ୍ରିକ ଥାନା ତନ୍ତିଆପାଳ ଅଧିନ ରାଙ୍କୀ ଗ୍ରାମରେ ।
ସୂଚନା ଅନୁଯାୟୀ ଗୋଆରେ କାମ କରୁଥିବା ଦେବାଶିଷ ନାୟକ ଗତ ୨୮ ତାରିଖରେ ଘରକୁ ଆସିଥିଲେ । ଦେବାଶିଷ ଘରୋଇ କାର୍ଯ୍ୟ ପାଇଁ ଟଙ୍କା ଆଣିଥିଲେ । କୌଣସି ସୂତ୍ରରୁ ଖବର ପାଇ ଦୁର୍ବୃତ୍ତମାନେ ଶୁକ୍ରବାର ବିଳମ୍ବିତ ରାତିରେ ଅଚାନକ ଦେବାଶିଷ ଏବଂ ତାଙ୍କ ମାଆଙ୍କୁ ଆକ୍ରମଣ କରି ଏକ ଲକ୍ଷରୁ ଅଧିକ ଟଙ୍କା ସହିତ ସୁନା ଚେନ, ମୁଦି ତିନୋଟି କାନଫୁଲ ଲୁଟି ନେଇଥିବା ଅଭିଯୋଗ ହୋଇଛି । ତେବେ ଦୁର୍ବୃତ୍ତଙ୍କ ଆକ୍ରମଣରେ ମାଆ-ପୁଅ ଗୁରୁତର ଥିବାରୁ ଥାନାରେ ଲିଖିତ ଅଭିଯୋଗ କରାଯାଇନାହିଁ । ସେପଟେ ଗ୍ରାମବାସୀ ତନ୍ତିଆପାଳ ଥାନାରେ ଚୋରି ନେଇ ଫୋନ ଯୋଗେ ମୌଖିକ ଭାବେ ଜଣାଇଛନ୍ତି ।
ଇଟିଭି ଭାରତ, କେନ୍ଦ୍ରାପଡା
