ବର୍ଡର ସିଲ କରିଛନ୍ତି ପଶ୍ଚିମବଙ୍ଗ ସରକାର: କେମିତି ଓଡିଶାରେ ପହଞ୍ଚୁଛି ଆଳୁ ଟ୍ରକ, କହିଲେ ବଙ୍ଗୀୟ ଡ୍ରାଇଭର

ରଜ୍ୟରେ ଉତ୍କଟ ରୂପ ନେଉଛି ଆଳୁ ସମସ୍ୟା ,ବଢୁଛି ଅସାଧୁ ବ୍ୟବସାୟ । ସେପଟେ ପଶ୍ଚିମବଙ୍ଗ ବର୍ଡର ସିଲ ହୋଇଥିବା ଯୋଗୁଁ ଆଳୁ ଟ୍ରକ ଆସୁନଥିବା କହିଛନ୍ତି ଟ୍ରକ ଚାଳକ ।

କଟକ: ରଜ୍ୟରେ ଚିନ୍ତା ବଢାଉଛି ଆଳୁ । ପଶ୍ଚିମବଙ୍ଗ ବର୍ଡର ସିଲ ପରେ ଓଡିଶାକୁ ଆସୁଛି କାଁଭାଁ ଆଳୁ ଗାଡି । କିନ୍ତୁ ସୀମା ପାର ହୋଇ ଗଳାବାଟ ଦେଇ ଟ୍ରକଗୁଡିକ କିପରି ଆସୁଛି ସେନେଇ କ୍ୟାମେରା ଆଗରେ ବଖାଣିଛନ୍ତି ଟ୍ରକ ଡ୍ରାଇଭର । ବେଙ୍ଗଲ ରାସ୍ତାରେ ଅଟକି ରହିଛି ଶହ ଶହ ଆଳୁ ଟ୍ରକ,ଧର୍ମଘଟ ବି ଚାଲିଛି । ଏହାରି ଭିତରେ ଓଡ଼ିଶାର ବିଭିନ୍ନ ଜିଲ୍ଲାରେ ଥିବା ଗଳାବାଟ ଦେଇ ସୀମାପାର ହୋଇ କଟକରେ ପହଞ୍ଚିଛି ଆଳୁ ଗାଡ଼ି ।

• ଅସାଧୁ ବ୍ୟବସାୟୀଙ୍କ ଉପରେ ଚଢାଉ:

ଆଳୁ ଦରକୁ ନେଇ ଚିନ୍ତା ବଳ ବଳବତ୍ତର ରହିଛି । ଯୋଗାଣ ବିଭାଗର ଚଢ଼ାଉ ପରେ ସମାନ୍ୟ ହ୍ରାସ ପାଇଛି । ଆଜି କଟକର ଛତ୍ର ବଜାରରେ ଆସି ପହଞ୍ଚିଛି ୬ଟି ଆଳୁ ଗାଡ଼ି । ଯାହା ମଧ୍ୟରେ ରହିଛି ୪ଟି ପଶ୍ଚିମ ବଙ୍ଗ ଓ ୨ଟି ଉତ୍ତର ପ୍ରଦେଶ ଆଳୁ ଗାଡ଼ି । ଦର ନିୟନ୍ତ୍ରଣ ପାଇଁ ଯୋଗାଣ ବିଭାଗ ପକ୍ଷରୁ ବିଭିନ୍ନ ଆଳୁ ବ୍ୟବସାୟୀଙ୍କ ଦୋକାନ ଓ ଗୋଦାମରେ ଚଢାଉ କରାଯାଇଛି । ସରକାରୀ ତାଗିଦ୍ ଓ ଯୋଗାଣ ବିଭାଗର ଚଢାଉ ସତ୍ତ୍ବେ ଆଜି ବି ତିନି କିଲୋ ଆଳୁକୁ ୧୩୦ ଟଙ୍କାରେ ବିକ୍ରି ହୋଇଥିବା ସୂଚନା ମିଳିଛି । ତେବେ ଦୀର୍ଘ ଏକ ସପ୍ତାହ ଧରି ପରିବା ବଜାରରେ ଆଳୁ ଦର ଉଚ୍ଚା ରହିଛି ।

• ଗଳାବାଟ ଦେଇ ଆସୁଛୁ, ଧରା ପଡିଲେ ଫସିବୁ : ବଙ୍ଗୀୟ ଟ୍ରକ ଡ୍ରାଇଭର

ଏନେଇ ବଙ୍ଗୀୟ ଟ୍ରକ ଡ୍ରାଇଭର କହିଛନ୍ତି,"ବିଭିନ୍ନ ଗଳା ବାଟ ଦେଇ ଓଡ଼ିଶା ଆସିବାକୁ ପଡୁଛି । ହେଲେ ଜଣାନାହିଁ ଆମ କେତେବେଳେ ଦଣ୍ଡିତ ହେବୁ । ପରିବାର ପୋଷଣ ପାଇଁ ଏଭଳି କରିବାକୁ ପଡୁଛି । ଓଡିଶାରେ ବଙ୍ଗଲ ଆଳୁ ପହଞ୍ଚିବା ପାଇଁ ଗୋଟିଏ ଦିନ ଲାଗେ ହେଲେ ବର୍ତ୍ତମାନ ୨ଦିନରୁ ଅଧିକ ସମୟ ଲାଗୁଛି । କିଏ ଜଣେ ଆସନ୍ତାକାଲି ଗାଡି ଫେରିବ କି ନାହିଁ କିନ୍ତୁ ପରିବାର ପୋଷଣ କରିବା ପାଇଁ ଏଭଳି ଢ଼ଙ୍ଗରେ ଗାଡି ନେଇକି ଆସିବାକୁ ପଡୁଛି ।"

'ଧିରେ ଧିରେ ନିୟନ୍ତ୍ରଣକୁ ଆସିବ':

ଏନେଇ କଟକ ଛାତ୍ର ବଜାର ପରିବା ବ୍ୟବସାୟୀ ସଂଘର ସମ୍ପାଦକ ଦେବେନ୍ଦ୍ର କୁମାର ସାହୁ କହିଛନ୍ତି," ଆଜି ଛତ୍ର ବଜାର ଗୋଦାମରେ ୬ଟି ଆଳୁ ବୋଝେଇ ଟ୍ରକ ଆସି ପହଞ୍ଚିଛି । ଯାହା ମଧ୍ୟରେ ରହିଛି ୪ଟି ପଶ୍ଚିମବଙ୍ଗର ଓ ଦୁଇଟି ଉତ୍ତର ପ୍ରଦେଶର ଆଳୁ ବୋଝେଇ ଟ୍ରକ । ଗତକାଲି ୫ଟି ଟ୍ରକ୍ ଆସିଥିବା ବେଳେ ଆଜି ଆଉ ଗୋଟିଏ ଅଧିକ ଟ୍ରକ୍ ଆସି ପହଞ୍ଚିଛି । ବର୍ତ୍ତମାନ ୟୁପିରୁ ଆସୁଥିବା ଆଳୁ କୁଇଣ୍ଟାଲ ପିଛା ୩୪୦୦ ଟଙ୍କା ପଶ୍ଚିମବଙ୍ଗରୁ ଆସୁଥିବା ଆଳୁ ୩୬୦୦ ଟଙ୍କାରେ ଗୋଦାମରେ ବିକ୍ରି କରଯାଉଛି । ତଥାପି ଖୁଚୁରାରେ ଆଳୁ ତିନି କେଜିକୁ ୧୩୦ ଟଙ୍କା ଓ କେଜି ପିଛା ୪୦ ରୁ ୪୩ ଟଙ୍କାରେ ବିକ୍ରି ହେଉଛି । ତେବେ ଧିରେ ଧିରେ ଆଳୁର ଦର ନିୟନ୍ତ୍ରଣକୁ ଆସିବ । ସେହିଭଳି ନୂଆ ଫସଲ ଖୁବ ଶୀଘ୍ର ଆସିବାକୁ ଥିବା ଯୋଗୁଁ ଏହି ଆଳୁ ଦର ବୃଦ୍ଧି ବେଶୀ ଦିନ ରହିବା ନାହିଁ ।"

ଇଟିଭି ଭାରତ, କଟକ