କେନ୍ଦ୍ରାପଡା : ଆସୁଛି ବାତ୍ୟା ଜୱାଦ । ସମ୍ଭାବ୍ୟ ବାତ୍ୟା ନେଇ IMD ସୂଚନା ମଧ୍ୟ ଦେଇଛି । ଚାଷୀଙ୍କ ପାଇଁ ପରାମର୍ଶ ଜାରି କରିଛନ୍ତି SRC। ତେବେ ଅଗଷ୍ଟ ମାସରେ ଲଗାଣ ବର୍ଷା ପରେ ପରେ ବନ୍ୟାର ବିଭୀଷିକାକୁ କେନ୍ଦ୍ରାପଡାର ଚାଷୀ ଭୁଲିନଥିବାବେଳେ ଏବେ ଆଗକୁ ଲଘୁଚାପ ଏବଂ ବାତ୍ୟାର ଆଉ ଏକ ସୂଚନା । ଲଘୁଚାପ ନେଇ ଖବର ପାଇବା ପରେ ଚାଷୀ ମୁଣ୍ଡରେ ଚଡକ ପଡିଛି। ବର୍ଷା ଓ ବନ୍ୟା ଦାଉରୁ ରକ୍ଷା ପାଇଯାଇଥିବା ଧାନଚାଷ ସମ୍ପୂର୍ଣ୍ଣ ଧୋଇଯିବାର ଆଶଙ୍କାରେ ଆତଙ୍କିତ କେନ୍ଦ୍ରାପଡା ଚାଷୀକୂଳ।
ଗତ ଅଗଷ୍ଟ ୧୪ ତାରିଖରେ ହୋଇଥିବା ଲଗାଣ ବର୍ଷା ପରେ ହଜାର ହଜାର ହେକ୍ଟର ଚାଷଜମି ଜଳମଗ୍ନ ହୋଇ ପଡ଼ିଥିଲା । ଅନ୍ୟପକ୍ଷରେ ଧାନଚାଷ ଜିଲ୍ଲାର ଏକମାତ୍ର ଅର୍ଥକାରୀ ଫସଲ ହୋଇଥିବାରୁ ଚାଷୀ ଧାନଚାଷ ପାଇଁ ବିଶେଷ ଯତ୍ନବାନ ହୋଇଥାଏ । ଏକର ପିଛା ପ୍ରାୟ ୨୨ ରୁ ୨୫ କିଲୋ ଧାନ ବିହନ ବ୍ୟବହାର ହୋଇଥାଏ ।
ତଳି ଉପାଡିବା, ରୋଇବା, ଧାନ ବିଲ ହଳ କରିବା ପ୍ରଭୃତି ବାବଦକୁ ପ୍ରାୟ ଅଢେଇ ରୁ ୩ ହଜାର ଟଙ୍କା ଶ୍ରମିକ ମଜୁରୀ ପଡିଥାଏ । ସେହିପରି ୫୦ କିଲୋ ସାର ଏବଂ ଆବଶ୍ୟକ ସ୍ଥଳେ କୀଟନାଶକ ବ୍ୟବହାର ହୋଇଥାଏ। ଏମିତିରେ ଏକର ପିଛା ଜଣେ ଚାଷୀ ପ୍ରାୟ ୫ ରୁ ୬ ହଜାର ଟଙ୍କା ଖର୍ଚ୍ଚ କରିଥାଏ । କିନ୍ତୁ ଶେଷରେ ପ୍ରାକୃତିକ ଦୁର୍ବିପାକ ଚାଷୀର ଭାତହାଣ୍ଡି ଉଜାଡ଼ି ଦେଇଯାଏ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
