କେନ୍ଦ୍ରାପଡା: ରାସ୍ତା ମଝିରେ ଯୁବତୀ ଦେଖାଇଲେ ଅଦମ୍ୟ ସାହସ ଓ ଶକ୍ତି, ଯେଉଁଥି ପାଇଁ ସାରା କେନ୍ଦ୍ରାପଡ଼ା ଜିଲ୍ଲା କହୁଛି ସାବାସ ତୃପ୍ତି । କୌଣସି ଫିଲ୍ମ ଠାରୁ କମ ନଥିଲା ଜଣେ କଲେଜ ଛାତ୍ରୀ ଓ ଦୁଇ ସୁନା ଲୁଟେରାଙ୍କ ମଧ୍ୟରେ ହୋଇଥିବା ଫାଇଟିଂର କାହାଣୀ ।
ଅଦ୍ଭୁତ, ଅବିଶ୍ବସନୀୟ ଏବଂ ଅକଳ୍ପନୀୟ ସାହସର ଅଧିକାରିଣୀ ତୃପ୍ତିମୟୀ । ଡକାୟତଙ୍କ ସହ ଲଢ଼ି ନିଜ ଜୀବନ ବଞ୍ଚାଇବା ସହ କାନଫୁଲ ଲୁଟେରାଙ୍କ କବଳରୁ ଉଦ୍ଧାର କରିଥିଲା । ଏଭଳି ଘଟଣା ଘଟିଛି କେନ୍ଦ୍ରାପଡ଼ା ସଦର ଥାନା ଅଞ୍ଚଳ କେନ୍ଦ୍ରାପଡ଼ା-ଗଣ୍ଡାକିଆ ରାସ୍ତାର ଓସ୍ତପୁର ନିକଟରେ । ଘର ତାଙ୍କର ଡେରାବିଶ୍ ବ୍ଲକ ଜଂରା ବାରିମୂଳ ଗାଁରେ । ହେଲେ ବାପା ବିଜୟ ବଳଙ୍କ ସହିତ ବଳରାମପୁର ଠାରେ ଭଡା ଘରେ ଦୀର୍ଘଦିନରୁ ରହୁଛନ୍ତି ତୃପ୍ତିମୟୀ ।
ଗତ ୨୫ତାରିଖ ଦିନ ଝିଅ ତୃପ୍ତିମୟୀ ନିଜ ମାମୁଁଘର ସାହସପୁରରୁ ଭଡାଘର ବଳରାମପୁରକୁ ଫେରୁଥିବା ସମୟରେ ଦୁଇ ଡକାୟତ ଏକ ମୋଟର ସାଇକେଲରେ ଝିଅଟିକୁ ଏକୁଟିଆ ଦେଖି ଫଲୋ କରିଥିଲା । ଗାଡ଼ିରୁ ଓହ୍ଲାଇ ତାର ବେକକୁ ଜଣେ ଚିପି ଧରିବା ସହ ଆଉ ଜଣେ ସୁନା କାନଫୁଲକୁ ଖୋଲିବାକୁ ପ୍ରୟାସ କରିଥିଲା । ତେବେ ଯୁବତୀ ଜଣକ ସାହସର ସହ ଦୁଇ ଡକାୟତଙ୍କ ମୁକାବିଲା କରି ନିଜ କାନଫୁଲକୁ ସୁକ୍ଷିତ କରିପାରିଥଲା । ତୃପ୍ତିର ସାହସ ଆଗରେ ହାର ମାନିଥିଲା ଡକାୟତ । ସେହି ସମୟରେ ଜଣେ ବାଟୋଇ ଆସିବାରୁ ଡକାୟତ ମାନେ ସାଇକେଲର ବାସ୍କେଟ ଆଗରେ ଥିବା ପର୍ସକୁ ଛଡାଇନେଇ ଫେରାର ହୋଇଯାଥିଲେ । ଏହି ସାହସିକତା ପାଇଁ ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ତୃପ୍ତିମୟୀ । ଦୁଇ ଡକାୟତଙ୍କୁ ଧରି ନପାରିବାରୁ ମନରେ ଅବଶୋଷ ରହିଗଲା ବୋଲି କହିଛନ୍ତି କେନ୍ଦ୍ରାପଡ଼ା ତୁଳସୀ ମହିଳା ମହାବିଦ୍ୟାଳୟର ଯୁକ୍ତ ୩ କଳା ପ୍ରଥମ ବର୍ଷର ଛାତ୍ରୀ ତୃପ୍ତିମୟୀ ବଳ ।
ଅପରପକ୍ଷରେ କେନ୍ଦ୍ରାପଡ଼ା-ଗଣ୍ଡାକିଆ ରାସ୍ତାରେ ଥିବା ଏକ ବିଦେଶୀ ଠିପିଖୋଲା ମଦ ଦୋକାନ ଯୋଗୁଁ ବାରମ୍ବାର ଏଭଳି ଘଟଣା ଘଟୁଥିବା ଅଭିଯୋଗ କରିଛନ୍ତି ଉଭୟ ଛାତ୍ରୀ ଓ ତାଙ୍କ ମା । କେବଳ ସେତିକି ନୁହେଁ, କଲେଜ ଆସିବା ଓ ଯିବା ସମୟରେ ଏହି ମଦ ଦୋକାନରେ ଅସାମାଜିକ ଲୋକଙ୍କ ଭିଡ଼ ଜମୁଥିବା ବେଳେ ଛାତ୍ରୀମାନଙ୍କୁ ଦୁର୍ବ୍ୟବହାର, କମେଣ୍ଟ କରିବା, ମଦ ଗ୍ଲାସ ପକାଇବା ଭଳି ଅଭିଯୋଗ ମଧ୍ୟ ହୋଇ ଆସୁଛି । ତେବେ ଗତ ୨୫ ତାରିଖରୁ କେନ୍ଦ୍ରାପଡ଼ା ସଦର ଥାନାରେ ଅଭିଯୋଗ ହୋଇଥିଲେ ମଧ୍ୟ ଉକ୍ତ ଦୁଇ ଡକାୟତଙ୍କ ଟେର ପାଇନାହିଁ କେନ୍ଦ୍ରାପଡା ସଦର ପୋଲିସ ।
ପୋଲିସ ୨୫/୨୧ରେ ଏକ ମାମଲା ରୁଜୁ କରି ଅଭିଯୁକ୍ତ ମାନଙ୍କୁ ଧରିବା ପାଇଁ ପ୍ରୟାସ ଜାରି ରଖିଥିବା କହିଛନ୍ତି ସଦର ଥାନା ଅଧିକାରୀ । ଝିଅର ସାହସିକତାକୁ ଧନ୍ୟବାଦ ଜଣାଇ ଏଭଳି କାର୍ଯ୍ୟ ଅନ୍ୟମାନଙ୍କୁ ପ୍ରେରଣା ଯୋଗାଇବ ଓ ନାରୀ ଅବଳା ଦୁର୍ବଳା ନୁହେଁ, ନାରୀ ସମସ୍ତ ଅସାଧ୍ୟକୁ ସାଧନ କରିପାରେ ବୋଲି କହିଛନ୍ତି ସ୍ଥାନୀୟ ବାସିନ୍ଦା । ତୃପ୍ତିମୟୀଙ୍କ ଏହି ସାହସିକତା ପାଇଁ ତାଙ୍କୁ ସବୁ ମହଲରୁ ପ୍ରଶଂସାର ସୁଅ ଛୁଟୁଛି । ଏଥିସହିତ ବିଭିନ୍ନ ମହଲରୁ ତାଙ୍କୁ ସମ୍ବର୍ଦ୍ଧିତ ମଧ୍ୟ କରାଯାଉଛି ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
