କେନ୍ଦ୍ରାପଡା: ବର୍ଷ ଆରମ୍ଭରୁ ସମ୍ବାଦିକଜଗତ ପାଇଁ ଦୁଃଖଦ ଖବର । ଖୁବ କମ ବୟସରେ ଅକାଳରେ ଆଖି ବୁଜିଛନ୍ତି ଯୁବ ସାମ୍ବାଦିକ ବ୍ରଜ କିଶୋର ସିଂହ । ହୃଦଘାତରେ ମାତ୍ର ୪୪ ବର୍ଷ ବୟସରେ ଦୁନିଆରୁ ବିଦାୟ ନେଇଛନ୍ତି ସାମ୍ବାଦିକ ବ୍ରଜ । ସେ ଦୀର୍ଘ ୧୦ ବର୍ଷ ଧରି ଦୈନିକ ଖବରକାଗଜ "ସମ୍ବାଦ'ରେ ରାଜକନିକା ବ୍ଲକ ପ୍ରତିନିଧି ଭାବରେ ନିର୍ଭୀକତାର ସହ ସାମ୍ବାଦିକତା କରି ଆସୁଥିଲେ।
ବ୍ରଜ ଯେ କେବଳ ଜଣେ ଉଚ୍ଚକୋଟୀର ସାମ୍ବାଦିକ ଥିଲେ ତା ନୁହେଁ ଜଣେ ସମାଜସେବୀ ମଧ୍ୟ ଥିଲେ । ବିଭିନ୍ନ ସାମାଜିକ ସଂଗଠନ ସହ ଓତଃପ୍ରୋତ ଭାବେ ଜଡିତ ଥିଲେ ବ୍ରଜ । ଖୁବ ମିଷ୍ଟଭାଷୀ ସ୍ବାଭାବର ଥିଲେ ସେ । ଗତକାଲି (ମଙ୍ଗଳବାର) ଅପରାହ୍ନରେ କଟକର ଏକ ଘରୋଇ ହସ୍ପିଟାଲରେ ତାଙ୍କ ବିୟୋଗ ହୋଇଛି । ପରିବାର ଲୋକଙ୍କ ଠାରୁ ନେଇ ଆତ୍ମୀୟ ସମସ୍ତେ ଶୋକରେ ବୁଡିଛନ୍ତି । ବ୍ରଜଙ୍କର ଏପରି ଅକାଳରେ ଚାଲିଯିବା ସମସ୍ତଙ୍କୁ ମର୍ମାହତ କରିଛି । ମହାନ ଆତ୍ମାଙ୍କ ଶେଷ ଦର୍ଶନ ପାଇଁ ଲୋକାରଣ୍ୟ ହୋଇଥିଲା ସମଗ୍ର ରାଜକନିକା ।
ତାଙ୍କ ମରଶରୀର ରାଜକନିକାରେ ପହଞ୍ଚିବା ପରେ ଏକ ଶୋଭଯାତ୍ରାରେ ଜାଗୁଳାଇପଡା, କଣ୍ଟପଡା, ବାଘବୁଦା ପଞ୍ଚାୟତ ପରିକ୍ରମା କରାଯାଇଥିଲା । ବ୍ରଜ ଭାଇ ଅମର ରହେ ଧ୍ବନିରେ ପ୍ରକମ୍ପିତ ହୋଇଥିଲା ସମଗ୍ର ଅଞ୍ଚଳ । ଶୋଭାଯାତ୍ରା ପରେ ତାଙ୍କ ଗଞ୍ଜାସ୍ଥିତ ବାସଭବନରେ ବହୁ ସାମ୍ବାଦିକ, ବରିଷ୍ଠ ନାଗରିକ, ରାଜନୈତିକ ବ୍ୟକ୍ତିମାନେ ପହଞ୍ଚି ଶେଷ ଦର୍ଶନ କରିଥିଲେ ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି,ଇଟିଭି ଭାରତ
