କେନ୍ଦ୍ରାପଡ଼ା: ଜିଲ୍ଲାରେ ବେକାବୁ ହେଲାଣି କୋରୋନା । ସୋମବାର ଜିଲ୍ଲାରେ 132ଜଣ ପଜିଟିଭ ଚିହ୍ନଟ ହୋଇଥିବା ବେଳେ ତନ୍ମଧ୍ୟରୁ 20ଜଣ ବାହାର ଜିଲ୍ଲାରେ ରହି ଚିକିତ୍ସିତ ହେଉଛନ୍ତି । ଆଜି ସୁଦ୍ଧା ଜିଲ୍ଲାରେ 600ରୁ ଊର୍ଦ୍ଧ୍ବ କୋଭିଡ଼ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ସେଥିମଧ୍ୟରୁ 90% ଆକ୍ରାନ୍ତ ବର୍ତ୍ତମାନ ଗୃହ ସଙ୍ଗରୋଧରେ ରହିଛନ୍ତି । ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା 600 ଟପିବା ପରେ ଜିଲ୍ଲା ପ୍ରଶାସନ ଟ୍ରେସିଂ, ଟ୍ରାକିଂ ଉପରେ ଅଧିକ ଗୁରୁତ୍ବ ଦେଇଛି ।
ଜିଲ୍ଲାକୁ ଫେରୁଥିବା ପ୍ରବାସୀଙ୍କୁ 7 ଦିନିଆ ହୋମ କ୍ବାରେଣ୍ଟାଇନ ବାଧ୍ୟତାମୂଳକ କରାଯାଇଛି । ଏହି ସମୟରେ କୌଣସି ଲକ୍ଷଣ ଦେଖାଦେଲେ ସେମାନେ ନିଜେ ଆସି ଟେଷ୍ଟ କରାଇ ନେବାକୁ ଅନୁରୋଧ କରିଛନ୍ତି ଜିଲ୍ଲାପାଳ। ସେହିପରି ଜିଲ୍ଲାର ଛତା ସ୍ଥିତ ସମ କୋଭିଡ ହସ୍ପିଟାଲରେ 180ଟି ଅକ୍ସିଜେନ ସିଲିଣ୍ଡର ଓ ପଟ୍ଟାମୁଣ୍ଡାଇ ଉପଖଣ୍ଡ ସ୍ତରୀୟ ଚିକିତ୍ସାକେନ୍ଦ୍ରରେ 40ଟି ଅକ୍ସିଜେନ ସିଲିଣ୍ଡର ମହଜୁଦ ରହିଛି । ଅକ୍ସିଜେନ ଶେଷ ହେବା ପୂର୍ବରୁ ଚଣ୍ଡୀଖୋଲ ଅକ୍ସିଜେନ ରିଫିଲିଙ୍ଗ ସେଣ୍ଟରରେ ଭର୍ତ୍ତି ହୋଇ ଆସୁଛି।