କେନ୍ଦ୍ରାପଡ଼ା: ଆଜି ଠାରୁ ପର୍ଯ୍ୟଟକଙ୍କ ପାଇଁ ଖୋଲିଲା ଭିତରକନିକା ଜାତୀୟ ଉଦ୍ୟାନ । କୁମ୍ଭୀର ପ୍ରଜନନ ଋତୁ ପାଇଁ ମେ' ପହିଲାରୁ ଜୁଲାଇ ୩୧ ପର୍ଯ୍ୟନ୍ତ ବନ୍ଦ ରହିଥିଲା ଭିତରକନିକା । ଏଣିକି ଗୁପ୍ତି, ଡାଙ୍ଗମାଳ ଓ ଖୋଲା ପଥ ଦେଇ ପ୍ରବେଶ କରିପାରିବେ ପର୍ଯ୍ୟଟକ । ପ୍ରବେଶ ପଥ ଗୁଡିକରେ ପର୍ଯ୍ୟଟକମାନଙ୍କୁ ବନବିଭାଗ ପକ୍ଷରୁ ସ୍ବାଗତ କରାଯିବାର ବ୍ୟବସ୍ଥା ରହିଛି ।
ଏହାଛଡା ଗହିରମଥା ଅଭୟାରଣ୍ୟ ଭିତରେ ଥିବା ହୁକିଟୋଲା ମଧ୍ୟ ଆଜି ଠାରୁ ପର୍ଯ୍ୟଟକମାନଙ୍କ ପାଇଁ ଖୋଲିଛି । ପ୍ରଥମଥର ପାଇଁ ଡାଙ୍ଗମାଳ ଠାରେ ସେଲ୍ଫି ପଏଣ୍ଟ ସହ ବୋଟ ଲାଇବ୍ରେରୀ ଆରମ୍ଭ କରାଯାଇଛି । ଏହି ଲାଇବ୍ରେରୀରେ ଭିତର କନିକାରେ ଥିବା ବିଭିନ୍ନ ପ୍ରକାର ପଶୁପକ୍ଷୀ, ବୃକ୍ଷଲତା ସମ୍ପର୍କିତ ଅନେକ ଶିକ୍ଷଣୀୟ ପୁସ୍ତକ ସ୍ଥାନ ପାଇଛି ।
ଏଥିସହିତ ହେନ୍ତାଳ ଗଛ ଗୁଡିକୁ ନେଇ ଏକ ନର୍ସରୀ ମଧ୍ୟ ତିଆରି କରାଯାଇଛି । ଏହି ନର୍ସରୀରେ ୬୭ ପ୍ରକାର ଲୁଣା ଗଛର ଚାରା ପ୍ରସ୍ତୁତ କରାଯିବାକୁ ରହିଥିବାବେଳେ ଏହି ହେନ୍ତାଳ ଚାରା ଗୁଡିକର ନାମ, ଏହାର ଉପାଦେୟତା ଓ ବିଶେଷତ୍ୱ ଫଳକରେ ଲେଖାଯାଇଛି । ଭିତରକନିକାର ପ୍ରାକୃତିକ ସୌନ୍ଦର୍ଯ୍ୟକୁ ଉପଭୋଗ କରିବା ପାଇଁ ୮ଟି ସରକାରୀ ବୋଟ ବ୍ୟବସ୍ଥା କରାଯାଇଛି । ସେହିପରି ଡାଙ୍ଗମାଳ ଓ ଗୁପ୍ତିରେ ରାତ୍ରିଯାପନ ପାଇଁ ଅନୁମତି ରହିଥିବାବେଳେ ହବେଳିଖଟିକୁ ଉଭୟ ଦିନ ଓ ରାତି ପ୍ରବେଶ ଓ ରହଣି ଉପରେ ରୋକ ଲଗାଯାଇଛି ।
ହବେଳିଖଟିରେ ଥିବା ଡଲଫିନ ହାଉସ ପର୍ଯ୍ୟନ୍ତ ସମୁଦ୍ର ମାଡି ଆସିଥିବା କାରଣରୁ ଯାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ଏଠାକୁ ପ୍ରବେଶ ବାରଣ କରାଯାଇଛି । ଅନ୍ୟପଟେ ଭିତରକନିକାର ଜୈବ ବିବିଧତା ରକ୍ଷା କରିବା ଉଦ୍ଦେଶ୍ୟରେ ଏଥର ପଲିଥିନ ବ୍ୟବହାର ଉପରେ କଟକଣାକୁ କଡାକଡି ପାଳନ କରାଯିବ ବୋଲି କହିଛନ୍ତି ରେଞ୍ଜର ।
ପୂର୍ବରୁ ପଲିଥିନ ପ୍ରବେଶ ଉପରେ କଟକଣା ଥିଲେ ହେଁ ପର୍ଯ୍ୟଟକ ଏହାକୁ ଭ୍ରୁକ୍ଷେପ କରୁନଥିଲେ । ଭିତରକନିକା ଜୈବ ବିବିଧତା ସହ ବଉଳା କୁମ୍ଭୀର ବିଶେଷକରି ଗୋରୀ ପାଇଁ ବିଶ୍ବପ୍ରସିଦ୍ଧ ହୋଇପାରିଥିବାବେଳେ ଚଳିତବର୍ଷ ପର୍ଯ୍ୟଟକ ମାନଙ୍କ ପାଇଁ ଭରପୁର ଆନନ୍ଦ ଯୋଗାଇଦେବ ବୋଲି ଆଶା ରଖିଛନ୍ତି ପରିବେଶପ୍ରେମୀ ।
ଇଟିଭି ଭାରତ, କେନ୍ଦ୍ରାପଡ଼ା
