କେନ୍ଦ୍ରାପଡା: ଅଙ୍ଗନବାଡି ଘରକୁ ଡାକି ନାବାଳକକୁ ହତ୍ୟା ଉଦ୍ୟମ । ଏପରି ଅଭାବନୀୟ ଘଟଣା ଘଟିଛି ଜିଲ୍ଲା ସଦରଥାନା ଅନ୍ତର୍ଗତ ଟୁବିହୁଡି ଗାଁରେ । ଘଟଣାସ୍ଥଳରୁ ଅଭିଯୁକ୍ତ ଫେରାର ହୋଇଛି ।
ସୂଚନାଅନୁସାରେ,୭ ବର୍ଷର ଶିଶୁ ମହେଶ୍ବର ଦଳାଇ ଘର ପାଖରେ ଖେଳୁଥିଲା । ସେହି ସମୟରେ ଜଣେ ଦୁର୍ବୃତ୍ତ ତାଙ୍କୁ ନିକଟସ୍ଥ ଅଙ୍ଗନବାଡି ଘରକୁ ଡାକି ନେଇ ବ୍ଲେଡରେ ତାର ବେକକୁ କାଟିବା ସହିତ ଆଙ୍ଗୁଠିକୁ ପଥରରେ ଛେଚି ଘଟଣାସ୍ଥଳରୁ ଫେରାର ହୋଇଯାଇଛି ।
ପିଲାଟିର ଚିତ୍କାର ଶୁଣି ସ୍ଥାନୀୟ ଲୋକ ତାକୁ ମାର୍ଶାଘାଇ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ଭର୍ତ୍ତି କରିଥିଲେ । ପିଲାଟିର ବେକରେ ଗଭୀର ଆଘାତ ଲାଗିଛି । ବର୍ତ୍ତମାନ ସେ ଚିକିତ୍ସିତ ହେଉଛନ୍ତି । ଶିଶୁଟିର ଘର ସଦର ଥାନା ଅନ୍ତର୍ଗତ ଅଟାବୁହା ଗାଁରେ ହୋଇଥିବା ବେଳେ ସେ ମାମୁଁ ଘର ଟୁବିହୁଡାକୁ ବୁଲିବାକୁ ଆସିଥିଲା ।
ଦୁର୍ବୃତ୍ତ ଜଣକ ଏପରି କାଣ୍ଡ ଘଟାଇବାର କାରଣ ଜଣାପଡିନାହିଁ । ପୋଲିସ ଘଟଣାସ୍ଥଳରେ ପହଞ୍ଚି ବ୍ଲେଡ ଏବଂ ରକ୍ତ ଭିଜା ଗାମୁଛା ଜବତ କରିବା ସହିତ ଅଧିକ ତଦନ୍ତ ଜାରି ରଖିଛି ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି,ଇଟିଭି ଭାରତ
