କେନ୍ଦ୍ରାପଡା: କୋରୋନା ମହାମାରୀ ସହ ଲଢେଇ କରିବାକୁ ରାଜ୍ୟ ସରକାର ଅନେକ ଅସ୍ଥାୟୀ କୋଭିଡ ହସ୍ପିଟାଲ ତିଆରି କରିଛନ୍ତି । ଡାକ୍ତର, ପାରାମେଡିକାଲ ଷ୍ଟାଫ, ଅନ୍ୟ ଷ୍ଟାଫଙ୍କ ସହ କଲ ସେଣ୍ଟର ଅନେକ କର୍ମଚାରୀଙ୍କୁ ବିଭିନ୍ନ ହସ୍ପିଟାଲରେ ନିଯୁକ୍ତ କରାଯାଇଛି । କୋରୋନା ମହାମାରୀ ସମୟରେ ରାଜ୍ୟ ସରକାରଙ୍କ ଆର୍ଥିକ ସ୍ଥିତିକୁ ବ୍ୟାପକ ପ୍ରଭାବିତ କରିଥିବେଳେ, ମହାଘୋଟଲାର ଅଭିଯୋଗ ଆଣିଛି ସୂଚନା ଅଧିକାର । କେନ୍ଦ୍ରାପଡା କୋଭିଡ ହସ୍ପିଟାଲରେ ପ୍ରାୟ ଦେଢ କୋଟି ଟଙ୍କାର ମହାଦୁର୍ନୀତ ହୋଇଥିବା ଅଭିଯୋଗ ହୋଇଛି । ଏହି ଦେଢ କୋଟିରୁ କେବଳ କୋଟିଏ ଟଙ୍କା କୋରୋନା ଯୋଦ୍ଧାଙ୍କ ଖାଦ୍ୟପେୟରେ ଖର୍ଚ୍ଚ କରାଯାଇଛି । ଯାହାକୁ ଏବେ ଚର୍ଚ୍ଚାର ବିଷୟ ପାଲଟିଛି ।
ଡାକ୍ତର, ପାରାମେଡିକାଲ ଓ ଅନ୍ୟ ଷ୍ଟାଫ କେବଳ ଖାଇବାରେ ଖର୍ଚ୍ଚ କରିଛନ୍ତି 98 ଲକ୍ଷ 52 ହଜାର 530 ଟଙ୍କା । ଆଉ ଏହି ଖର୍ଚ୍ଚ ହେଇଛି ଏପ୍ରିଲରୁ ଜୁଲାଇ, ମାତ୍ର 4 ମାସରେ । ସେହିପରି ଆଉ ଏକ ଉଦବେଦଗର କଥା ହେଉଛି ଏହି ସମୟ ମଧ୍ୟରେ କେବଳ 16 ଲକ୍ଷ ଟଙ୍କା ପେଟ୍ରୋଲ ପାଇଁ ଖର୍ଚ୍ଚ କରିଛନ୍ତି ଡାକ୍ତର ବାବୁ । ଯଦି କୋଭିଡ ଯୋଦ୍ଧା 4 ମାସରେ 98 ଲକ୍ଷ ଟଙ୍କା ଖାଇବାରେ ଖର୍ଚ୍ଚ କରିଛନ୍ତି , ତେବେ ରାଜ୍ୟରେ କୋଭିଡ ସଂକ୍ରମିତ ଓ ପ୍ରବାସୀଙ୍କ ପାଇଁ ସରକାର କେତେ ଖର୍ଚ୍ଚ ହୋଇଥିବା ତାକୁ ନେଇ ଏବେ ପ୍ରଶ୍ନ ଉଠିଛି ।
ସୂଚନା ଅଧିକାର କର୍ମୀ ପ୍ରକାଶ ଚନ୍ଦ୍ର ଦାସ କୋଭିଡ ପରିଚାଳନାର ଖର୍ଚ୍ଚ ଉପରେ କେନ୍ଦ୍ରାପଡା ହସ୍ପିଟାଲକୁ ତଥ୍ୟ ମାଗିଥିଲେ । କେତେ ସଂକ୍ରମିତ ହୋଇଥିଲେ, କୋଭିଡ ଖର୍ଚ୍ଚ ବିଲ , ଭାଉଚର , ପେମେଣ୍ଟ ଉପରେ କୌଣସି ତଥ୍ୟ ମିଳିପାରିନଥିଲା । ଅନୁସନ୍ଧାନ ପରେ କାର୍ଯ୍ୟାଳୟ ପକ୍ଷରୁ କେବଳ ଖାଦ୍ୟପେୟରେ 98 ଲକ୍ଷ ରୁ ଅଧିକ ଟଙ୍କା ଖର୍ଚ୍ଚ ହୋଇଥିବା ଜାଣିବାକୁ ପାଇଥିଲେ ।
