ଫୁଲବାଣୀ: କନ୍ଧମାଳ ଜିଲ୍ଲାର ଦାରିଙ୍ଗବାଡି ନିକଟରେ ପିକଅପ୍ ଭ୍ୟାନ ଓ ବାଇକ ମଧ୍ୟରେ ଧକ୍କା । ଦୁର୍ଘଟଣା ହେବାରୁ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଦୁଇ ଗୁରୁତର ଆହତ ହୋଇଛନ୍ତି । ଗୁରୁତର ଆହତଙ୍କୁ ବ୍ରହ୍ମପୁର ବଡ ମେଡିକାଲକୁ ପଠାଯାଇଛି ।
ଦାରିଙ୍ଗବାଡ଼ି ଥାନା ଡିପୁମାହା ଠାରେ ଏହି ଦୁର୍ଘଟଣାଟି ଘଟିଛି । ପୁରୁଣା ନୂଆଗାଁର ତିନିଜଣ ଯୁବକ ଦାରିଙ୍ଗବାଡ଼ି ବୁଲିବାକୁ ଆସିଥିଲେ । ବୁଲାବୁଲି ସାରି ନିଜ ଗାଁକୁ ଫେରୁଥିବା ସମୟରେ ସାରନିକେତା ନିକଟ ଡିପୁମାହାଠାରେ ଏକ ପିକଅପ ଭ୍ୟାନକୁ ଧକ୍କା ଦେଇଥିଲା ବାଇକ । ଯାହା ଫଳରେ ବାଇକ ଚଳାଉଥିବା ଯୁବକ ପୁରୁଣା ନୂଆଁଗାଁର ଧରମା ପାତ୍ରଙ୍କ ପୁଅ ଅନେସ ଚନ୍ଦ୍ର ପାତ୍ର( ୨୧)ଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା ।
ଅନ୍ୟପଟେ ପଛରେ ବସିଥିବା କାଶୀନାଥ ବିଶୋଇଙ୍କ ପୁଅ ନିଳା ବିଶୋଇ (୧୯) ଏବଂ ସୁଶାନ୍ତ ବିଶୋଇଙ୍କ ପୁଅ ଚନ୍ଦ୍ର ଶେଖର ବିଶୋଇ ବାଇକରୁ ଛିଟିକି ପଡି ଗୁରୁତର ଆହତ ହୋଇଥିଲେ । ଘଟଣାସ୍ଥଳରୁ ପିକଅପ ଭ୍ୟାନରେ ଆସୁଥିବା ମାଲିକ ଏବଂ ଡ୍ରାଇଭର ଆହତ ଦୁଇ ଜଣଙ୍କୁ ଦାରିଙ୍ଗବାଡ଼ି ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ । ଦୁହିଁଙ୍କର ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଛି ।
ଡ୍ରାଇଭରକୁ ପୋଲିସ ଅଟକ ରଖି ପଚରାଉଚରା ଜାରି ରଖିଛି। । ଥାନାରେ ୩୪/୨୦୨୦ରେ ଏକ ମାମଲା ରୁଜୁ କରିଛି ପୋଲିସ । ଏ ନେଇ ଅଧିକ ତଦନ୍ତ କରାଯିବ ବୋଲି ସୂଚନା ଦେଇଛନ୍ତି ଥାନା ଅଧିକାରୀ ।
କନ୍ଧମାଳରୁ ସଦାଶିବ ପାତ୍ର,ଇଟିଭି ଭାରତ
