ଫୁଲବାଣୀ: ରାଜ୍ୟରେ ସରିଛି ଦ୍ବିତୀୟ ପର୍ଯ୍ୟାୟ ନିର୍ବାଚନ। ହେଲେ ନିର୍ବାଚନ ସରିବା ପରେ ମଧ୍ୟ ନିଜ ଅଞ୍ଚଳକୁ ଫେରିନାହାନ୍ତି ପୋଲିଂ ପାର୍ଟି । କନ୍ଧମାଳର ଦାରିଙ୍ଗବାଡି ବ୍ଲକ ବ୍ରାହ୍ମଣୀଗାଁ ଥାନା ଅନ୍ତର୍ଗତ ବିଭିନ୍ନ ପୋଲିଙ୍ଗ ବୁଥକୁ ଯାଇଥିବା 40ରୁ ଅଧିକ ପୋଲିଂ ପାର୍ଟି ଘରକୁ ଫେରି ନଥିବା ଜଣାପଡିଛି ।
ରାସ୍ତା କ୍ଲିଅରାନ୍ସକୁ ଅପେକ୍ଷା କରି ବ୍ରାହ୍ମଣୀଗାଁ କଲେଜ ପରିସରେ ଅଟକି ରହିଛନ୍ତି। ପ୍ରାୟ 3 ଶହରୁ ଅଧିକ ପୋଲିଂ କର୍ମଚାରୀ ଖୋଲା ଆକାଶ ତଳେ ଆଶ୍ରୟ ନେଇଛନ୍ତି। ବ୍ରାହ୍ମଣୀଗାଁରୁ ଦାରିଙ୍ଗବାଡି ରାସ୍ତାର ସିକରମାହା ଘାଟି ଓ ଗଦାପୁର ନିକଟ ଘାଟିରେ ଲ୍ୟାଣ୍ଡମାଇନ ଭୟ ହେତୁ ପୋଲିସ ସେମାନଙ୍କୁ ମୁଖ୍ୟ ରାସ୍ତା ଦେଇ ଆଣିପାରିନାହିଁ।
ମାତ୍ର ଏମାନେ ରହିଥିବା ସ୍ଥାନରେ କୌଣସି ପାନୀୟ ଜଳ ଓ ଖାଦ୍ୟପେୟର ବ୍ୟବସ୍ଥା ହୋଇ ନାହିଁ ବୋଲି ପ୍ରିଜାଇଡିଙ୍ଗ ଅଧିକାରୀ ବ୍ରଜ ପଟ୍ଟନାୟକ ସୂଚନା ଦେଇଛନ୍ତି । ଫଳରେ ଏସମସ୍ତ ପୋଲିଂ କର୍ମଚାରୀ ଭୋକ ଉପାସରେ ରହିଛନ୍ତି। ସେହିପରି କୋଟଗଡ,ତୁମୁଡିବନ୍ଧ ବ୍ଲକର ଦୁର୍ଗମ ଅଞ୍ଚଳରୁ ମଧ୍ୟ ଫେରିନାହାଁନ୍ତି ପୋଲିଂ କର୍ମଚାରୀ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ