ଫୁଲବାଣୀ: ବୟସ ବଢିଛି, କିନ୍ତୁ ପାଠ ପଢି ପରୀକ୍ଷା ଦେବାର ଉତ୍ସାହ ଆଜିବି କମିନି । ପରିସ୍ଥିତି ତାଙ୍କ ପାଠ ପଢାକୁ ଅଟକାଇ ଦେଇଥିଲା ସତ କିନ୍ତୁ ବୟସ ଅଟକାଇ ପାରିଲାନି । ପାଠ ପ୍ରତି ଭଲପାଇବା ଓ ଆଗ୍ରହ ଯୋଗୁଁ ଆଜି 57 ବର୍ଷ ବୟସରେ ମାଟ୍ରିକ ପରୀକ୍ଷା ଦେଇଛନ୍ତି ଫୁଲବାଣୀର ବିଧାୟକ ଅଙ୍ଗଦ କହଁର । ଯାହା ଏବେ ଫୁଲବାଣୀରେ ଚର୍ଚ୍ଚାର ବିଷୟ ପାଲଟିଛି।
ବିଧାୟକ ପୂର୍ବରୁ ଦଶମ ପଢୁଥିବାବେଳେ ପାରିବାରିକ ସମସ୍ୟା କାରଣରୁ ସେ ମାଟ୍ରିକ ପରୀକ୍ଷା ଦେଇପାରି ନଥିଲେ । କାଳକ୍ରମେ ବୟସ ବଢ଼ିବା ସହ ସେ ରାଜନୈତିକ ବ୍ୟସ୍ତତା ଯୋଗୁଁ ସମୟ ବାହାର କରିନପାରି ପାଠପଢ଼ାରୁ ଦୁରେଇ ରହିଥିଲେ । ବୟସ୍କ ଲୋକମାନେ ପରୀକ୍ଷା ଦେଉଥିବା ବିଭିନ୍ନ ଗଣମାଧ୍ୟମରୁ ଖବରପାଇବା ପରେ ତାଙ୍କର ଜଣେ ଘନିଷ୍ଠ ବନ୍ଧୁଙ୍କ ସହ ଆଲୋଚନା ପରେ ଆଜି ଦୁହେଁ ପରୀକ୍ଷା ଦେଇଛନ୍ତି । ଯାହା ବୟସର ଅପରାହ୍ନରେ ପହଞ୍ଚୁଥିବା ଲୋକଙ୍କୁ ପାଇଁ ପ୍ରେରଣା ଯୋଗାଇବ ନିଶ୍ଚୟ ।
ସୂଚନା ଅନୁଯାୟୀ, ଆଜିଠାରୁ ଆରମ୍ଭ ହୋଇଛି ଦଶମ ଶ୍ରେଣୀ ପରୀକ୍ଷା । ଜିଲ୍ଲାରେ ମୋଟ ୧୧୬୯୪ ଜଣ ଛାତ୍ରଛାତ୍ରୀ ଚଳିତ ବର୍ଷ ଦଶମ ଶ୍ରେଣୀ ପରୀକ୍ଷା ଦେଉଥିବାବେଳେ ସେଥିମଧ୍ୟରୁ ୧୧୦୬୬ ଜଣ ପରୀକ୍ଷାର୍ଥୀ ରେଗୁଲାର ଛାତ୍ରଛାତ୍ରୀ ହୋଇଥିବା ବେଳେ ତନ୍ମଧରୁ ୯୩ ଜଣ ଏକ୍ସରେଗୁଲାର ଏବଂ ଅନ୍ୟାନ୍ୟ ୫୩୫ ଜଣ ଛାତ୍ରଛାତ୍ରୀ ପରୀକ୍ଷା ଦେଉଥିବା ଜଣାପଡ଼ିଛି ।
ସମସ୍ତ ପରୀକ୍ଷାର୍ଥୀ କୋଭିଡ୍ ଗାଇଡ଼ ଲାଇନ୍ ଅନୁସାରେ ପରୀକ୍ଷା କେନ୍ଦ୍ରରେ ପରୀକ୍ଷା ଦେଇଥିଲେ । ଜିଲ୍ଲାରେ ମୋଟ ୭୫ଟି ବିଦ୍ୟାଳୟରେ ପରୀକ୍ଷା କେନ୍ଦ୍ର କରାଯାଇଛି । ପରୀକ୍ଷା ପାଇଁ ଉଦ୍ଧିଷ୍ଟ ପ୍ରଶ୍ନପତ୍ର ସାତୋଟି ଥାନାକୁ ନୋଡାଲ ସେଣ୍ଟର୍ କରି କଡ଼ା ସୁରକ୍ଷା ମଧ୍ୟରେ ମହଜୁଦ ରଖାଯାଇଛି । ଜିଲ୍ଲାରେ କଡ଼ା ସୁରକ୍ଷା ଏବଂ କୋଭିଡ଼ ଗାଇଡ଼ ଲାଇନ୍ ଅନୁସାରେ ଚଳିତ ବର୍ଷ ଦଶମ ଶ୍ରେଣୀ ପରୀକ୍ଷା ଅନୁଷ୍ଠିତ ହେଉଥିବା ବେଳେ ଜିଲ୍ଲା ପ୍ରଶାସନ ପକ୍ଷରୁ ପରୀକ୍ଷା ଶୃଙ୍ଖଳାର ସହ ସାରିବାକୁ ପ୍ରଚେଷ୍ଟା ଜାରି ରହିଛି ।
କନ୍ଧମାଳରୁ ସଞ୍ଜୟ ପାତ୍ର, ଇଟିଭି ଭାରତ
