ରାଇରଙ୍ଗପୁର: ଶିମିଳିପାଳ ଫେରୁଛି ବାଘୁଣୀ ‘ଜୀନତ’ । ଆଜି ପଶ୍ଚିମବଙ୍ଗ ବନ ବିଭାଗ ବାଘୁଣୀ ଜୀନତକୁ ଓଡ଼ିଶା ବନ ବିଭାଗକୁ ହସ୍ତାନ୍ତର କରିଛି । ତାକୁ ଟ୍ରାକୁଲାଇଜ କରି କାବୁ କରିବା ପରେ କୋଲକାତାର ଅଲ୍ଲୀପୁର ଚିଡିଆଖାନାର ଏକ ସ୍ବତନ୍ତ୍ର ଖୁଆଡରେ ରଖାଯାଇଥିଲା । ହସ୍ତାନ୍ତର କରିବା ପରେ ତାକୁ ଶିମିଳିପାଳ ଅଭିମୁଖେ ଅଣାଯାଉଥିବା ମୟୂରଭଞ୍ଜ ଆରସିସିଏଫ ପ୍ରକାଶ ଚାନ୍ଦ ଗୋଗିନେନୀ ସୂଚନା ପ୍ରଦାନ କରିଛନ୍ତି ।
- ରାତି 8ଟାରେ ହସ୍ତାନ୍ତର କଲା ପଶ୍ଚିମବଙ୍ଗ ବନ ବିଭାଗ
ଶିମିଳିପାଳ ଅଭୟାରଣ୍ୟର ବାଘୁଣୀ ଜିନତକୁ ପଶ୍ଚିମବଙ୍ଗର ବାଙ୍କୁଡା ରାଣୀବନ୍ଧ ଜଙ୍ଗଲରେ ଗତ ୨୯ ତାରିଖ ଟ୍ରାଙ୍କୁଲାଇଜ କରା ଯାଇଥିଲା । ଏଥି ସହିତ ଜୀନତର ସ୍ବାସ୍ଥ୍ୟବସ୍ଥା ସାମାନ୍ୟ ହେବା ପାଇଁ କଲିକତା ସ୍ଥିତ ଅଲୀପୁର ଚିଡ଼ିଆଖାନାରେ ରଖା ଯାଇଥିଲା । ସେଠାରେ ଦୁଇ ଦିନ ଧରି ଜୀନତର ସ୍ବାସ୍ଥ୍ୟ ପରୀକ୍ଷା କରା ଯାଇଥିଲା । ଜୀନତ୍ ସମ୍ପୁର୍ଣ୍ଣ ସୁସ୍ଥ ହେବା ପରେ ଆଜି ପଶ୍ଚିମବଙ୍ଗ ବନବିଭାଗ ରାତି ପ୍ରାୟ ଆଠଟା ସମୟରେ ଶିମିଳିପାଳ କର୍ତ୍ତୃପକ୍ଷଙ୍କୁ ବାଘୁଣୀ ଜୀନତକୁ ହସ୍ତାନ୍ତର କରିଛନ୍ତି ।
- ସ୍ବତନ୍ତ୍ର ଗାଡିରେ ଆସୁଛି ଜୀନତ
ଆଜି ସ୍ବତନ୍ତ୍ର ଗାଡ଼ି ଯୋଗେ ବାଘୁଣୀ ଜୀନତକୁ ଶିମିଳିପାଳ ଅଭୟାରଣ୍ୟକୁ ଅଣା ଯାଉଛି । ତେବେ ଶିମିଳିପାଳ ପହଞ୍ଚିବା ପରେ ବାଘୁଣୀ ଯମୁନା ରହିଥିବା ସଫ୍ଟ ଏନକ୍ଲୋଜର ରେ ବାଘୁଣୀ ଜୀନତ୍ କୁ ଛଡାଯିବ ବୋଲି କହିଛନ୍ତି ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର ନିର୍ଦ୍ଦେଶକ ତଥା ଆଞ୍ଚଳିକ ମୁଖ୍ୟ ବନ୍ୟପ୍ରାଣୀ ସଂରକ୍ଷକ ଡ଼ଃ ପ୍ରକାଶ ଚାନ୍ଦ ଗୋଗିନେନି ।
- ଡିସେମ୍ବର ୮ରେ ଶିମିଳିପାଳ ଛାଡିଥିଲା ଜୀନତ:-
ଏଠାରେ ସୂଚନାଯୋଗ୍ୟ ଯେ, ମହାରାଷ୍ଟ୍ରର ତଡ଼ବା ଜଙ୍ଗଲରୁ ବାଘୁଣୀ ଜିନତ କୁ ଶିମିଳିପାଳ ଅଭୟାରଣ୍ୟକୁ ଅଣା ଯାଇଥିଲା । ଗତ ଡିସେମ୍ବର ୮ ତାରିଖରେ ଶିମିଳିପାଳରୁ ଜିନ୍ନତ ଝାଡ଼ଖଣ୍ଡ ଯାଇଥିଲା । ସେଠାରେ କିଛିଦିନ ବୁଲିବା ପରେ ଓଡ଼ିଶା ମୁହାଁ ହୋଇଥିଲା । ହେଲେ ଓଡ଼ିଶା ନଫେରି ପଶ୍ଚିମବଙ୍ଗକୁ ଚାଲି ଯାଇଥିଲା । ସେଠାରେ ବାଙ୍କୁଡାର ରାଣୀବନ୍ଧ ଜଙ୍ଗଲରେ ଡିସେମ୍ବର ୨୯ ତାରିଖ ଜୀନତ୍ କୁ ଟ୍ରାଙ୍କୁଲାଇଜ କରି କାବୁ କରା ଯାଇଥିଲା । ଜୀନତକୁ ଶିମିଳିପାଳ ଫେରାଇ ଆଣିବାକୁ ଓଡ଼ିଶା, ଝାଡ଼ଖଣ୍ଡ ଓ ପଶ୍ଚିମବଙ୍ଗ ବନବିଭାଗର ୧୨୦ ଜଣ ଏକ ଟିମ୍ ଲାଗିଥିଲା । ବାଙ୍କୁଡାର ରାଣୀବନ୍ଧ ଜଙ୍ଗଲରେ ଦୁଇଟି ମଇଁଷିର ଲୋଭ ଦେଖାଇ ଥିଲା ବନ ବିଭାଗ । ମଇଁଷି ଶିକାର କରିବା ଲୋଭରେ ଘଞ୍ଚ ଜଙ୍ଗଲରୁ ପଦାକୁ ବାହାରିବା ପରେ ପୂର୍ବରୁ ପ୍ରସ୍ତୁତ ହୋଇଥିବା ବନ କର୍ମଚାରୀମାନେ ତାକୁ ଟ୍ରାଙ୍କୁଲାଇଜ କରିବାକୁ ସକ୍ଷମ ହୋଇଥିଲେ ।
ଇଟିଭି ଭାରତ, ମୟୂରଭଞ୍ଜ
